Ambienti brenda skuadrës së PSG-së nuk ka gjetur ende qetësi, nga ajo që nga minuta në minutë duket se po merr trajtat e një mosmarrëveshjeje tepër të komplikuar për t’u sheshuar. Madje, mund të çojë edhe drejt largimit të një prej lojtarëve më të dalluar të skuadrës faraonike të kryeqytetit francez.
Pas shkëndijave të para për një goditje dënimi, që u agravuan edhe më shumë për goditjen nga 11 metrat, tashmë mes Neymar dhe Cavanit mund të thuhet se ka një krisje totale, aq sa mediet spanjolle i bëjnë jehonë thashethemeve për një kërkesë të qartë nga “O Ney”, drejtuar drejtpërsëdrejti presidentit Nasser Al-Khelaifi.
E përditshmja sportive spanjolle “Sport” publikon detaje mbi këtë dëshirë të Neymarit: të mos e ketë më nëpërkëmbë Cavanin! E thënë me fjalë të tjera, kërkesa e futbollistit më të shtrenjtë në historinë e merkatos botërore është shitja e uruguajanit.
Gjithçka nisi pas tensioneve mes të dyve në ndeshjen kundër Lionit, që u panë qartë në fushën e blertë, por që kanë vijuar më pas edhe në dhomat e zhveshjes, për atë se cili duhet t’i ekzekutojë goditjet e dënimit dhe penalltitë.
Discussion about this post