Menjëherë spo erdhi në krye të qeverisë, Ramush Haradinaj shkarkoi komisionin për shënjimin e kufirit dhe në vend të tij emëroi Shpejtim Bulliqin, i cili ashtu si Haradinaj mendonte se Kosova kishte humbur territor në përcaktimin e vijës kufitare me Malin e Zi.
Në lidhje me emërimin e tij si kryesuesi i Komisionit të ri për shënjimin e kufirit, ai ka treguar se Haradinaj, ende pa u emëruar kryeministër, i kishte thënë se s’ka tjetër njeri që i beson më shumë në këtë çështje, prandaj do të donte që ai ta udhëhiqte komisionin në qeverinë e tij.
“Për këto dy vjet e gjysmë kemi qenë në grupin e atyre qe e kemi kundërshtuar versionin e demarkimit të kufirit me Malin e Zi dhe për këtë kemi dhënë arsyet tona. Për mua do të jetë një sfidë dhe për ekipin që do të bashkëpunojmë. Puna jonë që është bërë deri tani ka qenë profesionale, jo politike”, ka deklaruar Bulliqi në Info Magazine të Klan Kosovës.
“Me Haradinajn jam takuar edhe para se të zgjidhet kryeministër i vendit, kur kanë përfunduar zgjedhjet, ne kemi pirë kafe dhe kemi diskutuar për këtë çështje dhe më ka thënë se njeriut që do t’ia besojë këtë detyrë jeni ju. Unë sigurisht s’e s’kam pasur asnjë arsye që ta refuzoj. Tani na është krijuar mundësia që t’i paraqesim institucionalisht defektet dhe lëshimet që janë bërë ne Demarkacionin me Malin e Zi”, ka thënë ai.
“Puna ime në këtë aspekt është tipike profesionale dhe s’ka të bëjë asgjë me politikë”, ka shtuar Bulliq, duke deklaruar se ai është punësuar si profesionist dhe jo si politikan.
“Unë ende jam në Lidhjen Demokratike të Kosovës, por punën do ta bëjë profesionalisht, pasi qeveria e vendit tim ma ka kërkuar dhe unë jam në gatishmëri”.
“Cilido njeri që do të kërkonte punën time, Shpejtim Bulliqi si mësimdhënës si njeri që kuptoj nga kjo fushë do të kisha gatishmëri të bashkëpunoja për ta çuar këtë proces tutje”, ka deklaruar Bulliqi. (B.H/Shuplaka)
Discussion about this post