Pas denoncimit të drejtorit të postës Barush Ahmeti, për paratë që i zhvati e dashura online, policia dyshon se ai po fsheh diçka tjetër.
Sipas bardhebluve, lidhja online është thjesht një justifikim për të fshehur shpenzimin e 60 milionë lekëve, të cilat ishin siguruar kryesisht nga vëllezërit e tij që jetonin në emigrim prej disa vitesh.
Kjo sepse ekspertët janë dyshues lidhur me deklaratën se Ahmeti ka shpenzuar 60 milionë lekë, duke i blerë dhurata të dashurës së tij që mbi të gjitha ishte vetëm online.
“Nuk mendojmë se ai ka shpenzuar gjithë këtë shumë për dhurata dhe pagesa faturash për vajzën. Ne po bëjmë një mbledhje të shumës së përgjithshme, por vlera e pretenduar nga denoncuesi është jashtë logjike. Kemi dyshime se ai e ka nxjerrë si justifikim ketë, për të mbuluar diçka tjetër. Ndoshta kërkon të justifikojë lekët te vëllezërit dhe familja e tij, ndaj jemi shumë me dyshime në lidhje me këtë ngjarje. Mbase paratë i ka shpenzuar diku tjetër, me baste a gjëra të tilla, dhe kërkon t’i justifikojë me dhuratat që i ka blerë të dashurës. Kjo ngjarje do të hetohet me imtësi, pasi pretendimet e palëve janë kontradiktore në lidhje me shumën e supozuar 60 milionë lekë”, thanë ekspertët e Policisë për gazetën Panorama.
Madje në sendet që i janë bllokuar vajzës nuk ka asgjë të kushtueshme. Madje edhe bizhuteritë, rrobat dhe këpucët e 27-vjeçares së akuzuar rezultojnë të gjitha të jenë mall tregu. (D.D/Shuplaka)
Discussion about this post