Luan Rama, zëvendëskryetari i LSI-së publikon fakte të reja për skandalin e radarëve. Këto janë faksimilet e pagesave që Ministria e Mbrojtjes i ka kryer kompanisë, megjithëse radarët nuk punojnë. Rama shkruan se Ministria e Mbrojtjes i paguan çdo muaj 97 milionë lekë kompanisë private për mirëmbajtjes e radarëve që nuk punojnë.
”Radarët e instaluar për të vëzhguar hapësirën detare të Republikës së Shqipërisë prej më shumë se dy vjet nuk punojnë! Thënë me “gjuhën” ushtarake, Sistemi i Integruar i Vëzhgimit të Hapësirës Detare (SIVHD) nuk është operacional!
Mosveprimi i strukturave përgjegjëse në Ministrinë e Mbrojtjes dhe në Shtabin e Përgjithshëm të Forcave të Armatosura është kriminal!
Sepse lënia jashtë funksioneve operacionale e sistemit të radarëve, ka cënuar drejtpërdrejtë sigurinë kombëtare!
Instalimi i serverit të kamerave që vëzhgon veprimtarinë e institucioneve ushtarake tek kompania private e kontraktuar per mirëmbajtjen e radarëve, është cënin i rëndë e flagrant i normave më elementare të sigurisë dhe të ruajtjes së informacionit!
Në një vend normal demokratik, vetëm kaq do të mjaftonte për ta konsideruar të gjithën një skandal të madh dhe që qeveria të jepte dorëheqjen!”, shkruan Luan Rama.
Por nga dokumentet e publikuara duken qartë pagesat e majme për kompaninë private ”IDEA-TEL”.
”Ministria e Mbrojtjes i paguan çdo muaj 97 milionë lekë kompanisë private që është kontraktuar të mirëmbajë Sistemin e Integruar të Vëzhgimit të Hapësirës Detare, edhe pse sistemi nuk është operacional!
Vetëm për një vit, prej korrikut 2015 deri në korrik 2016 i janë dhënë firmës private 1 miliardē e 150 milionë lekë për një punë që nuk e ka kryer!
Dhe si të mos mjaftonte kjo, në shkurt të ketij viti, pra në shkurt 2017 , komanda e forcave detare ka prokuruar një fond prej 370 milionë lekë shtesë, për punime dhe pajisje, që i janë dhënë të njejtës firmë, e cila në fakt duhej t’i instalonte si detyrim kontraktual, pasi është paguar çdo muaj me 97 milionë lekë, për një punë të pakryer!”, interpreton Rama i LSI-së.
Sipas tij skandali i korrupsionit të gjeneralëve nuk është vetëm kaq, pasi ka shpërdorim të frekuencave ushtarake dhe instalime private të pajisjeve të firmë në repartet ushtarake!
”Në vlerësimin tim jemi përpara një veprimtarie kriminale; organizim mafioz për defektimin e sistemit, cënim me vetëdije të sigurisë së njerëzve në det, cënim të elementëve thelbësorë të sigurisë kombëtare!
Çfarë presin institucionet e zbatimit të ligjit?!”, përfundon Rama.
Debati për radarët është hapur pas kalimit të gomoneve me ngarkesa të mëdha droge. ”Radarët nuk punojnë” qe fraza që nxiti përplasjet e eksponentëve të lartë të partive opozitare dhe policisë. A i fik kush radarët?! A hidhen në kosh pamje të rëndësishme? Kush i lejon gomonet të kalojnë detin drejt Italisë?!(V.G/SHUPLAKA)
[ngg_images source=”galleries” container_ids=”2878″ display_type=”photocrati-nextgen_basic_imagebrowser” ajax_pagination=”1″ order_by=”sortorder” order_direction=”ASC” returns=”included” maximum_entity_count=”500″]
