Ish-drejtori i Përgjithshëm të Policisë, Ahmet Prençi,ka thënë se deklaratat e ambasadorit amerikan, Donald Lu, janë një dëshmi e qartë se në Shqipëri pushtetin e ka krimi.
Për një intervistë për gazeten “Panorma”, ai është shprehur se kjo, është gjëja më e rëndë në këto 27 vjet.
Sipas tij krimi i organizuar mund të fuqizohet në momente dobësie të shtetit dhe kjo nuk është se nuk ka ndodhur. Por kur krimi merr mbështetje, mbrojtje e shkëmbim favoresh, atëherë quhet “Mafia”.
“Për këto detaje konkrete nga fjala e ambasadorit, mendoj që duhet të pyesni vetë zotin Lu. Gjithsesi, me sa jam informuar edhe nga media, kontaktet e partnerëve amerikanë me strukturat ligjzbatuese në Shqipëri vazhdojnë të mbeten intensive, çka më krijon bindjen se Policia Shqiptare e di se për çfarë bëhet fjalë konkretisht. Deklaratat e ambasadorit bazohen në Raportin e Departamentit të Shtetit, që ishte shumë alarmant, si asnjëherë, të shteteve të BE-së, pa harruar dhe mediat prestigjioze ndërkombëtare, që jo rrallë kanë shkruar për kriminalitetin shqiptar këtë periudhë aktuale.
Çështja është se çfarë ka bërë policia jonë gjatë kësaj periudhe për goditjen e tyre? Policia e Shtetit ka burimet e veta të informacionit për aktivitetin e gjithsecilit element kriminal, lidhjet mes tyre, ashtu sikurse dinë dhe nuhasin më së miri lidhjet që ata kanë me pushtetin. Kjo e fundit, sigurisht që e demotivon çdo pjesëtar të organizatës së Policisë së Shtetit. Nga kjo pikëpamje, Policia jo e jo, por asnjë qytetar nuk ka nevojë që t’ia tregojë informacionet një ambasadë, ambasador a shërbim partner. Ne këtu jetojmë dhe në këtë vend të vogël, gjithçka merret vesh, por e thënë nga ambasadori i SHBA-së, është shumë alarmante”, tha ai. (S.SH/Shuplaka)
Discussion about this post