Më 30 shtator 2017 një ngjarje e rëndë dhe skandaloze ka ndodhur në burgun e Peqinit. I dënuari me iniciale V.G. është masakruar në qelinë e tij nga Grupi i Gatshëm i Policisë, i cili kishte ardhur me pretekstin për të ushtruar kontroll. I burgosur iu është përgjigjur se nuk kishin sende të ndaluara por pas kësaj përgjigjeje, i dënuari pretendon se punonjësit e Grupit të Gatshëm e kanë goditur atë me shkopinj gome në pjesë të ndryshme të trupit si në shpinë, bark dhe shputat e këmbëve.
Ky skandal është bërë publik nga Komiteti Shqiptar i Helsinkit , që e ka hetuar dhe ka zbuluar se kjo ngjarje është fshehur.
“Dëmtimet e të burgosurit nuk janë prezantuar në kartelën mjekësore, asnjë punonjës nuk ka bërë kallëzim dhe drejtuesi i burgut deklaron se nuk ka dijeni për atë që ka ndodhur. KSHH vlerëson se ngjarja e mësipërme në të cilën është ushtruar dhunë fizike ndaj të dënuarit është shumë e rëndë. Ajo përbën vepër penale, madje në vështrim të Konventës Evropiane për të Drejtat e Njeriut ka elementë të trajtimit çnjerëzor. “, thuhet në njoftim.
Mësohet se për këtë dhunë ka qenë në djeni edhe shefi i regjimit të brendshëm të burgut, i cili nuk ka bërë asnjë kallzim për këtë vepër penale.
HETIMI NGA KOMITETI SHQIPTAR I HELSINKIT
Komiteti Shqiptar i Helsinkit, në bazë të një sinjalizimi se, në IEVP Peqin është ushtruar dhunë ndaj një të dënuari, në dt. 4 tetor 2017 kreu një verifikim nga ku rezultoi se në 30 shtator 2017, rreth orës 22.30, në Sektorin e Sigurisë së Lartë të IEVP Peqin, Grupi i gatshëm i Policisë së Burgjeve ka ushtruar kontroll për sende të ndaluara. Gjatë këtij kontrolli, uniformat e policisë së burgjeve janë futur në qelinë nr. 12, të këtij sektori, ku kanë pyetur të dënuarit e pranishëm nëse kishin sende të ndaluara. I dënuari V. G., është përgjigjur se nuk kishin sende të ndaluara. Pas kësaj përgjigjeje, i dënuari V.G pretendon se punonjësit e Grupit të gatshëm e kanë goditur atë me shkopinj gome në pjesë të ndryshme të trupit si në shpinë, bark dhe shputat e këmbëve.
Eksperti mjeko-ligjor në përbërje të grupit të KShH, pas ekzaminimit fizik të të dënuarit konstatoi katër ekimoza në shpinë dhe një në këmbën e djathtë sipër gjurit me gjatësi nga 5-15 cm, si dhe një hematomë në bark, majtas, me gjatësi rreth 10 cm, me ngjyrë mavi dhe të kuqërremtë të theksuar. Dëmtimet e mësipërme ishin lehtësisht të dukshme dhe të freskëta.
Të njëjtat rrethana të kësaj ngjarje u konfirmuan edhe nga i dënuari tjetër L. G., i pranishëm në të njëjtën qeli.
Në fakt, pas ushtrimit të dhunës, Grupi i gatshëm nuk ka kontrolluar qelinë për sende të ndaluara. Në dt. 2 tetor 2017, ditën e hënë, i dënuari V. G., deklaroi se është vizituar nga një infermier në spitalin e IEVP Peqin.
Grupi i KSHH kqyri kartelën personale mjekësore të të dënuarit dhe Librin e Shërbimit 24-orësh të urgjencës ku nuk figuronte asnjë e dhënë lidhur me vizitën apo shenjat e dhunës.
Në takim me drejtuesin e IEVP Peqin mësuam se, për këtë ngjarje kishte patur dijeni shefi i regjimit të brendshëm të burgut ndërsa vetë drejtuesi i IEVP Peqin nuk dinte gjë. Çdo punonjës i IEVP Peqin që ka marrë dijeni për këtë ngjarje kishte detyrimin ligjor të bënte menjëherë kallëzim penal pranë organeve kompetente. Është tepër shqetësuese neglizhenca ndaj kësaj ngjarje tepër flagrante, nga personeli që ka patur dijeni për të.
KSHH vlerëson se ngjarja e mësipërme në të cilën është ushtruar dhunë fizike ndaj të dënuarit është shumë e rëndë. Ajo përbën vepër penale, madje në vështrim të Nenit 3, të Konventës Evropiane për të Drejtat e Njeriut ka elementë të trajtimit çnjerëzor.
KSHH e dënon këtë vepër dhe kërkon verifikime të mëtejshme dhe marrjen e masave përkatëse ndaj personave përgjegjës. KSHH i drejtohet gjithashtu edhe Shërbimit të Kontrollit të Brendshëm në Burgje që kjo ngjarje të ndiqet penalisht duke zbatuar legjislacionin në fuqi. Duke marrë shkas nga kjo ngjarje, KSHH sugjeron që të merren masat përkatëse për respektimin rigoroz të ligjit dhe parandalimin e ngjarjeve të tilla.
(J.V/Shuplaka)
Discussion about this post