Sot Gjykata e Krimeve të Rënda i ka bllokuar pasaportën ish ministrit të Brendshëm Saimir Tahirit. Prej disa javësh hetimet vazhdojnë për ish-ministrin e Brendshëm pasi ai akuzohet për korrupsion dhe trafik droge.
Duhet të theksojmë që mazhoranca nuk e lejoi këtë masë kur u kërkua më herët së bashku me hetimin pasuror dhe arrestimin, gjykata e ka ndërmarrë vetëm tani këtë hap. Tahiri vetëm pak javë më parë udhëtoi drejt Gjermanisë por edhe në këtë rast nuk iu bllokua pasaporta.
Vendimi i gjykatës me kërkesë të prokuorisë erdhi pikërisht sot që në vendin tonë vjen ministri italian i Drejtësisë.
Sipas Lapsi.al ministri italian Andrea Orlando fluturon sot drejt Shqipërisë me një axhendë “blic” dhe do të takojë homolen e tij këtu, ministren e drejtësisë Eltida Gjonaj. Mësohet se se ministri italian do të kërkojë informacione për zhvillimin e hetimeve për dosjen e lënë në Tiranë nga kolegu i tij, ministri i Brendshëm Marco Minitti. Dosje këto që kanë të bëjnë kryesisht me trafikun e drogës nga brigjet shqiptare drejt Italisë, trafik në të cilin përfshihet edhe Habilaj.
Por në këto hetime përfshihet edhe Tahiri i cili akuzohet si bashkëpunëtor me Habilajt. Menjëherë drjetësia shqiptare ka marrë edhe hapin e saj, bllokimin e pasaportës të Tahirit. (J.V/Faxweb)
