“Futbollisti më i mirë në botë është Ronaldo! Kurrsesi, është Messi! Jo, është Ronaldo, jo është Messi…”! Debatet, shpesh edhe të ashpra, deri në hidhërime serioze mes miqve, me siguri do të zgjasin edhe shumë kohë në tërë planetin, duke bërë prej tyre “të mirin dhe të keqin”, “të ndritshmin dhe të errëtin”…
Por, ajo që ndodhi në El Clasicon e 175-të kampionale të shtunën që shkoi, tregon se mes këtyre dy viganëve të futbollit ekziston një respekt i madh i ndërsjellë, transmeton Gazeta Express.
Ishin disa momente gjatë ndeshjes dhe pas përfundimit të saj që treguan shumë qartë se Leo dhe Christiano nuk janë armiq. Këtë e kanë dëshmuar fjalët e Ronaldos menjëherë pas përfundimit të ndeshjes, në të cilën Barcelona në mes të Madridit triumfoi me 0:3 duke e lënë Realin madje 14 pikë prapa në tabelën e klasifikimit.
Siç zbuluan mediat lokale nga Barcelona, edhe atë duke iu referuar vetë Messit, pas përfundimit të El Klasikos Ronaldo i është afruar asit argjentinas dhe së pari i ka thënë: “Urime! E merituat fitoren”.
Por, Ronaldo s’do të ishte ai që është, një nga sportistët më të etshëm për triumfe, po të mos i kishte shtuar këtij urimi edhe diçka:
“Por…, mos mendo se do të heqim dorë nga lufta për titullin, se një gjë e tillë as që na bie ndër mend”, ka porositur portugezi.
Messi pas kësaj vetëm ka buzëqeshur, duke mos pasur asgjë kundër asaj që duelet e tyre të vazhdojnë përderisa dallimi në pikë në tabelë është i tillë çfarë është tani.
Kujtojmë që gjatë Ronaldo në ndeshjen ndaj Barcelonës nuk bëri një paraqitje të mirë, ai kishte dhe mundësi ta kalonte Realin në avantazh para se të shënonte Barcelona, por nuk arriti të godiste topin nga brenda zonës edhe pse kishte një rast të volitshëm për të shënuar.
Barcelona në pjesën e dytë u tregua pragmatiste, ndërkohë që mbrojtja e Realit linte për të dëshiruar, Carvajal e la ekipin me 10 lojtarë pasi ndali me dorë një top që po shkonte drejt portës, ndërsa Messi penalltinë e akorduar me të drejtë na gjyqtari e shndërroi në gol.
(B.H/Faxweb)
Discussion about this post