Ka nisur punimet Asambleja e Socialistëve ku pritet të bëhet analiza e 100 ditëve të para të qeverisjes. Punimet janë hapur nga Taulant Balla, që është njëherësh edhe sekretar në këtë parti.
Balla e ka nisur me një autokritikë sa i përket ecurisë së organizmit të Partisë, sidomos edhe sa i përket angazhimit të grave dhe vajzave në nivele drejtuese.
“Të qeverisim me besnikëri ndaj atyre që na votuan. Partia është ura lidhëse mes Kuvendit dhe qeverisjes.
Nuk jemi aspak ku duhet në lidhje me organizmin e Partisë. Shokë dhe shoqe deri në muajin nëntor ne kemi përmbyllur në 90 % zgjedhjet në pjesën organizative të vendit”, u shpreh mes të tjerash Balla.
Në mbledhjen në vijim pritet që të behët edhe bilanci i 100 ditëve të para të qeverisjes. Po ashtu një zhvillim tjetër që kanë njoftuar socialistët është edhe vendosja e prioriteteve për këtë vit të ri që sapo ka nisur.
Një tjetër pikë që do të diskutohet është edhe struktura e re e bashkëqeverisjes me qytetarët. Për këtë do të ketë një raportim të Koordinatores Kombëtare për Bashkëqeverisje, Elisa Spiropali, e cila zëvendësoi Saimir Tahirin në këtë detyrë.
Po ashtu ka zëra se në mbledhjen e sotme sekretariati ekzekutiv do të pësojë ndryshime. Pritet të ketë emërtime të reja të sekretarëve, duke ndryshuar dhe funksionin e tyre, ndërsa nuk priten ndryshime të emrave aktualë.
Aktualisht 8 sekretarët e PS janë Bashkim Fino, Alfred Peza, Musa Ulqini, Stefan Çipa, Elisa Spiropali, Blerina Gjylameti, Ilir beqaj, dhe Taulant Balla, i cili prej muajsh mban postin e Sekretarit të Përgjithshëm të Partisë Socialiste. Në media kjo është cilësuar edhe si ”prerje kokash”.
(E.K/Faxweb)
Discussion about this post