Kryetarja e Lëvizjes Socialiste për Integrim Monika Kryemadhi ka reaguar për dhunën e ushtruar nga policia ndaj banorëve të Verrisë të cilët protestuan, që siç shprehet Kryemadhi, që në tokat e tyre të mos helmohen, të mos helmohen fëmijë e tyre dhe të mos sëmuren, bagëtitë e tyre të mos ngordhin nga helmet, dhe akoma më shumë të mos detyrohen të emigrojnë dhe të largohen nga shtëpitë e tyre.
Gjithashtu kryetarja e LSI-së i bën thirrje dhe Edi Ramës që të heq dorë nga plehrat, sepse do të përfundojë në kazanin e plehrave edhe ai vetë, por i pariciklueshëm më.
“I bëj thirrje çdo shqiptari që sot të solidarizohet me Verrinë. Ky impiant nuk mund të ndërtohet aty, për shkak sepse ato janë toka buke, dhe ne mezi po gjejmë dhe po hapim toka të reja buke për shqiptarët.”
Ndër të tjera Kryemadhi shprehet se “i ftoj të gjithë qytetarët në datën 27 Janar të jenë në protestë kundër mafies së plehrave, kundër vjedhjes së naftëtarëve, kundër pabesisë që ushtrohet ndaj qytetarëve shqiptarë.”
Deklarata e plotë
Në qytetin e Fierit banorët janë duke u dhunuar barbarisht nga Policia e Shtetit për shkak sepse kërkojnë që në tokat e tyre të mos helmohen, të mos helmohen fëmijë e tyre dhe të mos sëmuren, bagëtitë e tyre të mos ngordhin nga helmet, dhe akoma më shumë të mos detyrohen të emigrojnë dhe të largohen nga shtëpitë e tyre.
Incinerimi nuk ka vend në Shqipëri, përveçse kur kërkohen rast për të përpunuar plehrat që vijnë nga vendet e tjera të Bashkimit Europian. Dhe nëse ky është qëllimi i Edi Ramës, ky nuk është qëllimi i shqiptarëve. Ndaj sot beteja në Vërri nuk është thjesht e atyre banorëve, por e gjithë shqiptarëve. Është beteja kundër mafies së plehrave, që është instaluar në Shqipëri.
I bëj thirrje dhe Edi Ramës që të heq dorë nga plehrat, sepse do të përfundojë në kazanin e plehrave edhe ai vetë, por i pariciklueshëm më. I bëj thirrje çdo shqiptari që sot të solidarizohet me Verrinë. Ky impiant nuk mund të ndërtohet aty, për shkak sepse ato janë toka buke, dhe ne mezi po gjejmë dhe po hapim toka të reja buke për shqiptarët.
Prandaj i ftoj të gjithë qytetarët në datën 27 Janar të jenë në protestë kundër mafies së plehrave, kundër vjedhjes së naftëtarëve, kundër pabesisë që ushtrohet ndaj qytetarëve shqiptarë, dhe të protestojnë atje të gjithë shqiptarët pa dallim bindjesh politike, pa flamuj politik, por me flamurin e shpresës për ti kthyer ata qindëra dhe mijëra të rinj shqiptarë, që janë larguar nga Shqipëria për shkak të qeverisjes jashtëzakonisht të keqe të Edi Ramës.” (M.Q/Faxweb)
