Takimi me Tsipras, Rama flet dhe për të drejtat e çamëve

Kreu i qeverisë Edi Rama ka mbledhur grupin parlamentar të PS-së, ku ka zbardhur dhe temat e takimeve të mbajtura në Davos.

Sipas tij Shqipëria është shumë pranë çeljes së negociatave, dhe se në BE janë shumë të qartë se askush nuk do mund që ta pengojë zbatimin e Reformës në Drejtësi.

Po ashtu Rama ka folur dhe në lidhje me dialogun me kryeministrin grek Aleksis Tsipras po pa dhënë detaje në lidhje me marrëveshjen e shkruar që pritet të firmoset.

Rama ka përmendur se në diskutim kanë qenë tema të nxehta që kanë prekur marrëdhënien mes dy vendeve në 70- vitet e fundit.

‘’ Dua po ashtu të vë në dukje se jemi në një moment jashtëzakonisht pozitiv në dialogun tonë me Greqinë.

Siç e shprehu publikisht kryeministri grek, pajtohem me të se nënshkrimi i një marrëveshje është shumë afër.

Duhet të presim marrëveshjen e shkruar të kësaj serie dialogu, duke filluar që te ligji absurd i luftës, deri te marrëveshja për kufirin detar, apo garantimi i të gjithë qytetarëve shqiptar, sidomos atyre që i përkasin komunitetit çam, për të pasur lëvizje të lirë e të pandikuar nga e shkuara, dhe për të pasur një akses ligjor për pretendimet e tyre në lidhje me të drejtën e pronësisë”, u shpreh Rama.  

(E.K/FAXWEB)