Protesta e djeshme në Athinë, derdhi në sheshin Sintagma qindra mijëra grekë.
Organizatorët u shprehën se në shesh kishin zbritur rreth 1 milionë e gjysmë protestues, ndërsa nga Policia u tha se në shesh ishin rreth 140 mijë.
Po përtej numrave, masiviteti i protestës ishte i dukshëm. Emrin e Maqedinisë grekët e konsiderojnë si një vjedhje të historisë së tyre.
E veçanta e kësaj proteste ishte se gjithçka nisi si një organizim qytetar në rrjetet sociale, e ndryshme nga Shqipëria, ku nëse politika nuk është në shesh, askush nuk del që të protestojë.
Një nga personazhet kryesore të protestës ishte padyshim fjalimi i kompozitorit grek, 92-vjeçarit Mikis Theodhorakis, një figurë simbolike e Greqisë.
Një natë më parë, anarkistët kishin sulmuar shtëpinë e tij duke shkruar me bojë të kuqe në hyrjen kryesore mesazhe kërcënuese. Pavarësisht kësaj Theodhorakis doli në protestës dhe deklaroi publikisht se ishte “gati dhe shumë i qetë”.
“Maqedonia ka qenë, është dhe do të jetë përgjithmonë Greqi” i tha Teodorakis turmës së njerëzve, duke theksuar se çdo sugjerim për zgjidhjen e çështjes duhet të vendoset me një referendum.
“Nëse një qeveri duhet të firmosë në emër të vendit, nuk ka asnjë dyshim që më parë, duhet të pyesë popullin grek” u shpreh Teodorakis para qindra mijëra protestuesve që mbanin në duar flamuj ku shkruhej “Duart larg nga Maqedonia” dhe “Maqedonia është Greqi”.
Qeveria e majtë e Syriza-s ka propozuar një zgjidhje që e përfshin fjalën Maqedoni brenda emrit zyrtar të shtetit fqinj, por që e diferencon qartë nga krahina e Maqedonisë në Greqi. Por për shumë grekë, sërish kjo zgjidhje është e papranueshme.
Ministri Kotzias pas protestës u shpreh se mesazhi i qytetarëve ishte marrë, dhe se ai do të vijonte negociatat. Vetë ai ka marrë tre kërcënime në ditët e fundit. E megjithatë qeveria greke është e vendosur që të vijojë me negociatat.
Qytetarët e shumtë që ishin në shesh u shprehën se vendimi për Maqedoninë duhet të kalojë nga referendum dhe se qeveria e Tsipras është pakicë.
(E.K/FAXWEB)
Discussion about this post