Pas lajmit që u bë publik ditën e djeshme se në dosjen e Prokurorisë për rrugën Tiranë-Elbasan, dhe Elbasan-Gjinar, është nën hetim dhe ish-ministri Edmond Haxhinasto, ka ardhur reagimi dhe nga ky i fundit.
Haxhinasto, në një prononcim për mediat ka thënë se nuk e ka problem hetimin, dhe se nuk ndihet i shqetësuar nga ky fakt.
Haxhinasto ka thënë se është i gatshëm të hetohet por ka shtuar se nëse ky është sulm politik, ai do përgjigjet shumë ashpër.
“S’më shqetësojnë fare as hetimet, as verifikimet. Unë kam bërë drejtimin politik të ministrisë. Gjithëkush është i lirë të verifikojë. Gjithë veprimtaria ime është bërë mbi bazën e dokumentave që janë atje. Të verifikohen, unë jam i gatshëm.
Por gjithashtu duhet t’ju them se koha e drejtësisë popullore kur ngriheshin thashethemnaja dhe njerëzit goditeshin qoftë moralisht, qoftë fizikisht ka përfunduar bashkë me sistemin e kaluar. Unë jam këtu, do jem këtu. Nëse kjo do të degjenerojë në goditje politike, unë do t’i përgjigjem politikisht shumë rreptë.”ka thënë ish-ministri.
(F.G/Faxweb)
