Vlora Çitak, ambasadorja e Kosovës në SHBA ka publikuar në profilin e saj në Twitter letrën e urimit për pavarësi nga Pavarësia Sopa, vajza që u lind pak minuta pasi Kosova shpalli pavarësinë më 17 shkurt 2008.
Në letër thuhet:
“I dashur mik,
Emri im është Pavarësia. Unë u linda më 17 shkurt 2008, pak minuta pasi vendi im shpalli pavarësinë e tij. Atë ditë unë isha në mesin e të porsalindurve më me fat në botë, sepse u linda e lirë. Dua t’ju falënderoj që e mundësuat këtë.
Në shqip, emri im do të thotë pavarësi. Jam krenare që e mbaj këtë emër dhe e kuptoj rëndësinë e tij. Gjithashtu e dua flamurin e Kosovës sepse historia e tij është e lidhur me ditëlindjen time.
Jam rritur bashkë me vendin tim dhe këtë vit që të dy jemi 10 vjeç. Urimi im i ditëlindjes është që Kosova të bëhet një shtet i mrekullueshëm dhe që të gjithë fëmijët në Kosovë të kenë një të ardhme të lumtur.
Me dashuri, Pavarësia Sopa.
Fëmija i parë i lindur pas Pavarësisë së Kosovës.
(B.H/Faxweb)