Kryesia e Kuvendit të Kosovës, pak minuta më parë, ka marrë vendimin që seanca më çështjen e Demarkacionit të Kufirit me Malin e Zi do të mbahet nesër në orën 11:00.
Kryetari i grupit parlamentar të Partisë Demokratike të Kosovës, Memli Krasniqi, siguroi se qëndrimi i PDK-së është pro ratifikimit të Demarkacionit. Ai tha se është e rëndësishme që Demarkacionin ta votojnë shqiptarët dhe jo të ngelet në dorën e serbëve. Krasniqi tha se 23 votat e tyre janë në favor të projektligjit, por duke qenë se do të duhen të paktën 80 vota që të kalojë, Krasniqi ka ftuar partitë e tjera që të deklarojnë votën e tyre.
Ndërkohë që edhe kreu i Kuvendit, Kadri Veseli, është shprehur i bindur se Demarkacioni nesër do të kalojë. Pyetjes se nëse janë siguruar votat e Listës Serbe, Veseli iu përgjigj i bindur se demarkacioni do të kalojë me apo pa Listën Serbe.
Gjithashtu edhe kryetari i grupit parlamentar të Lëvizjes Demokratike të Kosovës, Avdulla Hoti, është shprehur se në seancën e nesërme, 27 deputetëtë e partisë së tij, do të jenë të gatshëm ta votojnë Demarkacionin. Përveç kësaj, ai theksoi se kjo është e njëjta marrëveshje që u nënshkrua në gusht të vitit 2015 e për të cilën, LDK ka më tepër se dy vite që këmbëngul.
Ndryshimin e vetëm në qëndrimin karshi Demarkacionit, siç pritej, e ka bërë Lëvizja Vetvendosje. Kryetari i grupit parlamentar të Vetëvendosjes, Glauk Konjufca, ka shprehur kundërshtimin ndaj projektligjit të marrëveshjes me Malin e Zi. Konjufca ka paralajmëruar se deputetët e Vetëvendosjes do të mbajnë fjalime ku do të synojnë të ndikojnë kolegët e tjerë të LDK, se miratimi i Demarkacionit do të ishte gabim. Konjufca u shpreh se kundërshtimi i Vetëvendosjes nuk do të shkojë deri në hedhje të gazit lotsjellës në sallën e Kuvendit.
(E.L/Faxweb)
Discussion about this post