Nga “Të të marrin të keqen ty O Saimir, ne do bëjmë namin, O Elvis O Hero, gjithë Kavaja ty të do tek “Më i forti i Lezhës”, si protestuan shqiptarët në mbrojtje të politikanëve të akuzuar… Faxweb.al sjell në vëmendje disa episode që duhen kujtuar.
Protesta për kryebashkiakun e arrestuar të Lezhës, Fan Frrokaj ka vijuar dhe këtë të dielë përpara ambienteve të komisariatit, ku Frrokaj mbahet i arrestuar.
Protestuesit kanë kërkuar lirimin e Frrokajt me arsyetimin se ky i fundit është i pafajshëm.
Kjo nuk është e para protestë që në Shqipëri populli kërkon lirimin nga akuzat të një zyrtari që i qeveris.
Në vitin 2016, në qershor, kohë kur në publik doli skandali i Elvis Roshit, asokohe kryebashkiak i Kavajës, rezultoi se ishte dënuar në Itali vite më parë me akuzën “përdhunim në grup”, qytetarët e Kavajës dolën të protestonin.
“As në ëndërr nuk e kisha parë këtë ndryshim në Kavajë. Të vijnë të marrin të gjithë shembull!“-tha njëri prej protestuesve.
Roshi kishte dhënë dorëheqjen nga posti i kryebashkiakut, e ndërsa qytetarët kërkonin pafajësinë e Roshit, ai përbetohej për pafajësi dhe rikthim në krye të Bashkisë.
“Elvis Rroshin do ta keni kryetar bashkie prapë …” tha ai mes brohoritjeve.
Muajt kaluan dhe Roshi humbi mandatin. Me damkën e një të inkriminuari ai nuk mund te vazhdonte detyrën e kryetarit të bashkisë së Kavajës.
PROTESTE NE MBESHTETJE TE ELVIS ROSHIT, KAVAJE, QERSHOR 2016
E njëjta skenë ndodhi dhe me ish-ministrin Saimir Tahiri. Edhe pse mbi Tahirin rëndojnë edhe sot akuzat e kanabizimit të vendit dhe trafikut ndërkombëtar të drogës, jo pak simpatizantë u përlotën gjatë rrëfimit të tij në Opinion.
Gjatë orëve të ankthit, kur Tahirit rrezikohej t’i hiqej mandati, para ambienteve të Kuvendit, mbështetësit e tij, kërkuan pafajësinë e disa prej tyre u revoltuan edhe me gazetarët.
“Mos ki frikë o trim”, dëgjohej nga turma.
MBESHTETESIT E TAHIRIT:
https://www.youtube.com/watch?v=KagWACyT_C4&feature=youtu.be
“Këtu ka ndodhur Gërdeci dhe janë vrarë katër të tjerë”, tha një tjetër .
“Nuk të lëmë ne ty, do bëjmë namin”.-tha një tjetër.
Ndërsa sot, në Lezhë përsëritet e njëjta skenë. Qytetarët e Lezhës, prej dy ditësh kërkojnë lirinë e Frrokajt. I akuzuar për tjetërsim prone, kryebashkiaku i Lezhës gëzon “mbështetje” të admirueshme në qytet.
“Qeveria është e lidhur kokë e këmbë me krimin, ky është një sulm politik për të rrëzuar më të fortin e Lezhës”-janë shprehur mbështetësit e Frrokajt.
https://www.youtube.com/watch?v=LenolvLmKq4
Mesa duket, bashkëqytetarët janë të bindur në pafajësinë e përfaqësuesve të tyre politike përpara se drejtësia të dalë me një vendim.
Fjola Graçi-Faxweb.al.
