Dënohet me burgim të përjetshëm Denis Shtraza, rrëmbeu dhe vrau Gazmend Çollakun

Gjykata e Krimeve të Rënda ka dënuar me burgim të përjetshëm Denis Shtrazën.

Shtraza është gjetur fajtor për vrasjen e Grazmend Çollakut në vitin 2016. Më herët gjatë seancave gjyqësore, Shtraza ka thënë se kishte pasur raporte miqësore me personin për të cilin akuzohet ta ketë rrëmbyer dhe vrarë.

“Gazmend Çollakun e kam njohur në vitin 2008 në burg. Në atë kohë unë vuaja një dënim për ‘mbajtje pa leje të armëve dhe municioni’, ndërsa ai vuante një dënim për “plagosje”. Ishim në të njëjtin sektor. Gjatë kësaj kohe kam pasur marrëdhënie të mira me të, si dy çuna durrsakë. Kemi agjëruar bashkë në burg. Për marrëdhënien time miqësore me Çollakun kanë pasur dijeni edhe persona të tjerë”, është shprehur më herët Shtraza.

Sipas tij, ky raport miqësor ka vijuar edhe pas përfundimit të dënimit me burg. “Pasi kam dalë nga burgu dhe ai vazhdonte të ishte i dënuar, unë i kam çuar cigare në burg Gaz Çollakut. Kur ai përfundoi dënimin, ne jemi takuar disa herë dhe kemi pirë kafe bashkë. Unë njihja dhe të fejuarën dhe familjarët e tij, pasi jetonim në të njëjtën lagje në Durrës”, ka deklaruar më herët Shtraza.

(E.K/FAXWEB)