Zbardhet dhe dokumentohet me prova ligjore vjedhja e një automjeti në Sarandë dhjetë ditë më parë. Pas hetimeve disaditore, policia ka bërë të mundur kapjen e autorit në Tiranë.
Ai është shtetasi Mihal Llazari, 24 vjeç, banues në Himarë.
Ndalimi i tij bë i mundur pas informacioneve të siguruara nga Policia e Sarandës se ky shtetas fshihej në Tiranë.
“Mihali Llazari, 24 vjeç, banues në Himarë; më datë 19.03.2018, në fshatin Berdenesh, Sarandë ka vjedhur automjetin tip “Benz”, të shtetasit D.R.
Shtetasi rezulton me precedent penal në fushën e narkotikëve”, thuhet në njoftimin e policisë.
Mësohet se në momentin e arrestimit 24-vjeçarit i janë gjetur edhe 4 gramë substancë narkotike, e cila nuk përcaktohet dot se çfarë lloj droge është, dhe për këtë gjë do të çohet në laborator.
Automjeti i vjedhur prej tij u sekuestrua në cilësinë e provës materiale, ndërsa në Prokurorinë e Rrethit Gjyqësor Sarandë, u referuan materialet në ngarkim të 24-vjeçarit Llazari për veprat penale “Vjedhje” dhe “Prodhimi, shitja e narkotike”.
