Ardian Nezha, prokurori i Elbasanit, i emëruar më pak se tre muaj më parë nga Arta Marku, i dorëzoi kryeprokurores së Përkohshme mbrëmjen e sotme dorëheqjen.
Pavarësisht aludimeve për ’40 dosjet e nxehta’ që ai kishte detyrë të hetonte, ende nuk ka një arsye zyrtare se pse Ardian Nezha e la postin ku u vendos në 8 janar të këtij viti.
Po kush është prokurori Ardian Nezha?
Kur prokurorja e Përgjithshme e Përkohshme Arta Marku më 9 janar, shkarkoi prokurorin e komanduar nga Adriatik Llalla në Elbasan, Dritan Ginën, për ta zëvendësuar me prokurorin e përkohëshëm Dritan Nezha, i pari refuzoi t’ia linte zyrën të dytit.
Gina gjithashtu, paditi prokuroren e Përgjithshme Marku tek Krimet e Rënda për shkarkimin e tij. Megjithatë Gjykata e hodhi poshtë padinë e Ginës dhe Nezha nisi punën si prokuror i përkohshëm i Elbasanit
Por para tij ishte një punë aspak e lehtë.
Në një takim mes kryeprokurores Marku dhe Ardian Nezhës në Prokurorinë e Elbasanit në datë 22 shkurt 2018, burimet e informacionit bënë me dije se në ngarkim të këtij të fundit u vunë për t’u hetuar rreth 40 dosje për çështje pastrami parash, vjedhje pronash, vrasjesh e korrupsioni.
Në të kaluarën profesionale të prokurorit Ardian Nezha mund të përmendim disa hetime.
Ai ka hetuar çështjen në ngarkim të Leonard Bombajt, drejtuesit të grupit kulturor të fëmijëve “Kripëmajltëzat”.
Ai ka hetuar gjithashtu edhe të ashtuquajturën “bandën e tritolit”.
Në vitin 2015 me lëvizjet nga ish-kreu Adriatik Llalla, Ardian Nezha nga prokuror pranë Prokurorisë për Krime të Rënda, u transferua prokuror pranë Prokurorisë së Rrethit Gjyqësor Pukë.
(E.L/Faxweb)
