Në një kohë që biznesi i vogël ka paralajmëruar një protestë paraditen e sotme duke ulur qepenat për një orë Ministri i Financave dhe Ekonomisë, Arben Ahmetaj ka dalë në një bashkëbisedim me gazetarët.
Gjatë takimit, Ahmetaj deklaroi se opozita po gënjen qytetarët duke i vënë ata në panik, duke thënë se po rritet TVSH ndërsa shtoi se opozita kërkon ta përdorë politikisht këtë ngjarje .
Ministri deklaroi gjithashtu se nga bizneset e vogla arkëtohen rreth 1 miliard lekë nga TVSH, që përfaqëson vetëm 0.08 për qind të totalit. Pjesa tjetër, thotë ai, janë mbledhura nga biznesi i madh.
Më tej Ahmetaj siguroi bizneset se nuk do të ketë gjoba për deklarim të gabuar deri në 31 dhjetor të 2018 për biznesin nga 2 deri në 5 milionë lekë xhiro.
“Bizneset nën 2 milionë lekë xhiro, pra rreth 60 mijë biznese nuk kanë nevojë të paguajnë TVSH. S’është biznesi i vogël gjeneratori i të ardhurave nga TVSH sepse 99.2 % e TVSH-së vjen nga biznesi i madh, vetëm 0.5% vjen nga biznesi i vogël”-deklaroi gjatë fjalës se tij Ministri Ahmetaj.
(S.M/Faxweb.al)
