Tekniku i Realit të Madridit nuk e ndie aspak mirë për dërgimin në dhomat e zhveshjes me karton të kuq të portierit të Juventusit për protestën ndaj gjyqtarit të ndeshjes.
Zinedine Zidane shpreson që kjo të mos jetë ndeshja e fundit e Gianluigi Buffon në Ligën e Kampionëve.
Tekniku francez beson se portieri veteran meriton një përfundim më të denjë të karrierës së tij në Champions.
Buffon mori karton të kuq, pasi reagoi me zemërim ndaj vendimit të gjyqtarit Michael Oliver për t’i dhënë Madridit një penallti në kohë shtesë, të cilin Cristiano Ronaldo e shndërroi më pas në kualifikim.
Madrilenët fituan në total 4-3 ndaj Zonjës së Vjetër, pavarësisht humbjes 3-1 të mërkurën.
Veterani 40-vjeçar i portës bardhezi reagoi me zemërim pasi gjyqtari britanik dha 11 metërsh për mbretërit, pasi Medhi Benatia ndërhyri ndaj Lucas Vazquez për t’i hequr topin në zonë, duke i dhënë fund kësisoj rikthimit të mrekullueshëm të Juventusit.
Ishte kartoni i parë i kuq për Buffon në të gjithë karrierën e tij në Ligën e Kampionëve dhe ndoshta i fundit për veteranin 40-vjeçar, nëse së shpejti, ai do të vendosë të tërhiqet edhe nga kombëtarja “azzurre” dhe nga futbolli.
I pyetur për daljen e Buffon me karton të kuq, trajneri i Realit, Zinedine Zidane, i cili njësoj si Buffon u dërgua me të kuq në dhomat e zhveshjes në ndeshjen e tij të fundit si profesionist, pas asaj goditje me kokë ndaj Marco Materazzi, tha: “Unë nuk mendoj se ai meriton të dalë në këtë mënyrë , por tani nuk ka kthim prapa.
“Ajo që ndodhi në fund të lojës nuk do të ndryshojë asgjë nga ajo që ai ka bërë në lojë.
Ai është një lojtar i mrekullueshëm dhe kjo ndoshta nuk do të jetë paraqitja e tij e fundit në Ligën e Kampionëve”.
Reali i Madridi arriti të kalonte në gjysmëfinale të Ligës së Kampionëve pas humbjes 3-1 në Santiago Bernabeu, duke fituar 3-0 në Torino javën e kaluar.
Madrilenët arriti të shmangin kohën shtesë, përmes një 11-metërshi në momentet e fundit, pikërisht kur Lucas Vazquez u prek nga mbrojtësi Benatia, duke thyer përfundimisht zemrat e juventinëve.
(E.L/Faxweb)
