Xhaxhai i Ardit Gjoklajt, Lush Gjoklaj pas deklaratës në studion e “Fax News”në përfundim të procesit gjyqësor për dy të akuzuarit, Dëfrim Hakrama dhe Edmond Kollari, është shoqëruar në polici.
Lush Gjoklaj u shoqërua në polici për t’u marrë në pyetje.
Burime pranë policisë bënë me dije se Lush Gjoklaj u pyet mbi kërcënimet që ka bërë për kryebashkiakun Erion Veliaj.
Edhe në polici Gjoklaj është shprehur se nuk po vihet në vend drejtësia për nipin dhe se dy personat që u arrestuan si përgjegjës, u shpallën të pafajshëm nga gjykata.
Në momentin që Lush Gjoklaj ka dhënë deklaratën në polici, shoqërohej nga babai i Ardit Gjoklajt, aktualisht punonjës policie.
17-vjeçari Ardit Gjoklaj gjeti vdekjen në landfillin e sharrës pasi u shtyp nga fadroma që drejtohej nga Edmond Kallari, ndërsa punonte në vendgrumbullimin e plehrave në gusht të 2016.
Ardit Gjoklaj ishte i punësuar nga firma 3R shpk e kontraktuar nga Bashkia e Tiranës.
Edhe pse i mitur, bashkia e kishte punësuar në kushte të vështira gjatë orëve të natës.
Për vdekjen e Gjoklajt u çuan në gjykatë përgjegjësi i turnit të kompanisë 3R shpk Dëfrim Hakrama, si dhe fadromisti Edmond Kallari.
Edhe pse prokuroria kërkoi dënimin e tyre, gjykata penale e Tiranës i shpalli ata të pafajshëm.
Fax News shkoi në shtëpinë e Dëfrim Hakramaj. Edhe pse ai nuk pranoi të fliste për këtë çështje, familjarë të tij konfirmuan se 3 ditë më parë ai është liruar nga burgu dhe se është i pafajshëm.
(F.G/Faxweb.al)
Discussion about this post