Rama në konferencë me Donald Tusk: Mik i mirë i shqiptarëve, e pritëm me diell

Kryeministri Edi Rama ka nisur një konferencë të përbashkët me  Presidentin e Këshillit Europian, Donald Tusk.

Rama u shpreh se Tusk është një mik i mirë i shqiptarëve dhe një nga mbështetësit më të mëdhenj të integrimit të mëtejshëm të Shqipërisë dhe vendeve të rajonit.

“Jemi të vetëdijshëm për të gjitha sfidat dhe vështirësitë që na presin në këtë proces, ashtu si kemi bindjen e plotë se sfidat janë të kapërcyeshme vetëm mes bashkëpunimit dhe ndërveprimit që deri tani na ka sjellë në këtë pikë mes nesh KE dhe vendeve anëtare.

Për ne ky proces lidhet me të ardhmen e vendit, detyrimi ndaj gjeneratave dhe ndërtimit të Shqipërisë evropiane këtu. Do mund, durim dhe kohë, por është një proces që jemi të përfshirë se e kërkon interesi ynë kombëtar. 

Me presidentin që është njohës i thellë i rajonit, folëm edhe për procesin e thellimit të bashkëpunimit ndër rajonal dhe nënvizova se ky proces është i lidhur me perspektivën evropiane të vendeve të rajonit. Ne e pritëm me një diell që shkëlqen në lartësinë e famës së dritës në vendin tonë, jam i bindur që pos të tjerave dielli i Shqipërisë do t’ja lehtësojë peshën e grisë së Brukselit prej nga ai sapo ka ardhur”, tha Rama.

(E.K/FAXWEB.AL)