Pas incidenteve në fundin e ndeshjes mes Partizanit dhe Skënderbeut, Federata Shqiptare e Futbollit i kërkoi Komisionit të Shqyrtimit të Kundërvajtjes në Policinë e Shtetit procedimin administrativ ndaj deputetit Erion Braçe.
Në një letër dërguar organeve policore, Sekretari i Përgjithshëm i Federatës, Ilir Shulku, duke vënë në dijeni edhe Byronë e Parlamentit, kërkon ndëshkimin me gjobë të deputetit socialist.
Në letër thuhet se, Braçe, kreu një gjest të shëmtuar në shkallët e stadiumit, duke tentuar të godasë me sende të ndaluara zyrtarët e ndeshjes Partizani – Skënderbeu.
Çakmaku, thuhet në letër, përbën kundërvajtje administrative dhe dënohet me gjobë nga dhjetëmijë deri në pesëdhjetëmijë lekë. Duke mbyllur letrën Shulku, rikujton se edhe në të kaluarën deputetët kanë shkaktuar incidente të panevojshme në shkallët e stadiumeve, për t’i kthyer ato në “kredit” politik.
Ndërkohë vetë Braçe nuk i ka pranuar akuzat, teksa ka lëshuar dhe akuza në drejtim të një pjese të mediave, duke i quajtur ato si të kapura nga Armando Duka.
(E.K/FAXWEB.AL)
