Pesë gjërat që ju zgjasin jetën me mbi 10 vite

Dieta e shëndetshme, ushtrimet fizike të rregullta (rreth 30 minuta në ditë), mbajtja e peshës në normë, të mos abuzosh me alkoolin dhe të mos pini cigare. Këto janë 5 gjërat që ju shtojnë jetën me të paktën 10 vite.

Ky është konkluzioni i arritur pas një studimi të kryer së fundi nga ekspertë të Universitetit të Harvardit, në bashkëpunim me Shkollën Publike të Shëndetit në Boston. Studimi u publikua nga revista shkencore “Circulation”.

Nga hulumtimi u arrit në konkluzionin se personat që respektojnë këto pesë zakone në jetë, kanë 82 % më pak shanse të vdesin nga sëmundjet kardiovaskulare dhe 65 % më pak shanse për të vdekur nga kanceri.

Në studim morën pjesë 78.865 gra të monitoruara për 34 vite si dhe 44.354 meshkuj të monitoruar për 27 vite. Sipas përllogaritjeve të kryera rezulton se femrat që respektonin pesë zakonet e përmendura më sipër jetonin plot 14 vite më shumë ndërkohë meshkujt 12 vite më shumë.

(M.Q/Faxweb)