Kryeministri Edi Rama ka hedhur akuza të forta në drejtim të opozitës, duke thënë se po tentojnë të lëvizin çdo gurë për të penguar integrimin e Shqipërisë.
Pas largimit të PD-së dhe të LSI-së nga salla e Kuvendit, Rama u shpreh se mungesa e votës së tyre për rezolutën ku kërkohet çelja e negociatave, rrezikon rrugën e Shqipërisë drejt BE-së.
Pjesë nga deklarata e Ramës: Sot është hera e parë që një parti braktis sallën e Kuvendit, kur bëhet fjalë për një interes kombëtar të kësaj natyre. PS erdhi në Kuvend kur bëhej fjalë për hyrjen në NATO dhe kountribuoi në hartimin e kësaj projekt-rezolute, ndërsa votoi unanimisht me PD-në që ishte në qeveri.
Ndërkohë që në të njëjtën kohë ndodhi dhe tragjedia e Gërdecit, ndërsa unë u kritikova se pse nuk e kthyem politik këtë moment që mund të dëmtonte hyrjen e Shqipërisë në NATO.
Kjo rezolutë që do të votohet sot është një vullnet i të gjithë qytetarëve shqiptarë, ndodh ajo që se ka bërë asnjë parti politike kurrë më parë, ikin nga salla, refuzojnë të votojnë një rezolutë që kërkon çeljen e negociatave.
Duke u votuar vetëm nga ne, nxjerr një tjetër problem në korridoret e BE-së, pasi zërat kundërshtarë mund ta kenë një arsye më shumë që të thonë se ‘’parlamenti i shqipërisë nuk është dakord në mënyrë unanime për hapjen e negociatave”.
Shqipëria është i vetmi rast ku nuk ka konsensus dhe unitet kombëtar në komunikimin me të huajt, po ka një opozitë që nuk lë gur pa lëvizur për ta shkatërruar këtë proces.
(E.K/FAXWEB.AL)
Discussion about this post