Pas marrjes së vendimit nga ana e Kolegjit të Pavarur të Apelimit për Adriatik Llallën ka reaguar për mediat dhe avokati i tij Sokol Hazizaj.
Për faktin se Llalla i shpëtoi Vetingut Hazizaj u shpreh se ky është vendimi i parë i drejtë i marrë nga Reforma e re e drejtësisë.
“Ndalimi për të hyrë në organet e drejtësisë deri në 15 vjet, që e kishte nënkuptuar edhe KPK. Me këtë sot, ligji fitoi, e drejta gjithashtu, sot mendoj se reforma në drejtësi ka marrë suksesin e parë. Karakteri universal apo i përgjithshëm i vendimit të KPA, do të jetë si udhërrëfyes, detyrim i vendimeve të tjera që janë në të njëjtin standard fakti dhe prove, nuk lë asnjë dyshim ky vendim, edhe detyrues”- tha Hazizaj.
Ndërkohë që i pyetur nga gazetarët në lidhje me vendodhjen e Llallës, Hazizaj refuzoi të përgjigjej duke u shprehur: Unë tregoj adresën time jo të Adriatik Llallës.
Prej kohësh në media kanë dalë detaje lidhur me lëvizjet e Llallës jashtë vendit, nga Turqia në Gjermani.
‘’Janë përmbushur elementët deklarativë të dorëheqjes nga detyra, pasi është zbatuar një prej rrugëve procedurale të legjislacionit në fuqi. Kolegji çmon se vendimmarrja e Komisionit të Pavarur të Kualifikimit ka qenë e drejtë dhe duhet konfirmuar.
Kolegji i Posaçëm i Apelimit me shumicë votash vendosi: ndërprerjen e procesit të rivlerësimit për Adriatik Llallën. Ndalimin e emërimit të tij, gjyqtar, prokuror, inspektor apo anëtar të KLD-së për një periudhë prej 15 vitesh”, thuhet në arsyetimin e KPA-së.
(E.K/FAXWEB.AL)
Discussion about this post