Zinedine Zidane, ish-trajner i Real Madrid, i cili u largua disa ditë më parë, shprehet se nuk e di çfarë do të bëjë tani, pas këtij vendimi.
Ai ka deklaruar se tani ndihet i shplodhur, duke shqyrtuar të gjithë ofertat, por ende nuk ka vendosur se çfarë drejtimi do të marrë.
“Jam shplodhur dhe nuk e di se çfarë do të bëj. Vendimi që mora ishte i rëndësishëm, të shohim tani se çfarë do të ndodhë”, tha francezi gjatë inaugurimit të një parku për fëmijë të Adidas-it në Saint-Denis, në afërsi të Parisit.
Në prag të Botërorit, ish-numri 10 i Francës dha mendimin e tij edhe mbi kombëtaren e “Gjelave”.
“Është një ekip që ka vërtetë potencial. Shpresoj që të ecë sa më shumë të jetë e mundur dhe pse jo, të fitojë Botërorin”, u shpreh Zidane.
Në vetëm dy sezone e gjysmë, Zinedine Zidane fitoi 3 Champions League me Realin e Madridit dhe një kampionat spanjoll, mes shumë trofeve të tjerë. (E.V/Faxweb.al)
Discussion about this post