Pas nënshkrimit të marrëvershjes mes kryeministrit grek Cipras dhe atij maqedonas Zaev për emrin e Maqedonisë, ka ardhur dhe reagimi i Ministrisë së Europës dhe Punëve të Jashtme të Shqipërisë.
“Kjo është koha e zgjidhjeve madhore në mbarë rajonin tonë, bazuar në vullnetin e përbashkët për stabilizim përfundimtar të hapesirës ku gjendemi me synimin për ta bërë atë pjesë të pandarë të Bashkimit Evropian”, thuhet në reagim.
Deklarata e plotë:
Ministria për Evropën dhe Punët e Jashtme e Republikës së Shqipërisë përshëndet nënshkrimin sot në Psarades të marrëveshjes historike për emrin të arritur me 12 qershor mes Kryeministrave Tsipras dhe Zaev.
Nga Prespa piktoreske që bashkon tre popujt dhe vendet tona fqinjë, qytetarët e dy vendeve, të rajonit, përfaqësuesit e Bashkimit Evropian dhe Kombeve të Bashkuara, u bënë dëshmitarë të një faqeje të re të fqinjesisë së mirë dhe bashkëpunimit me kah evropian.
Kjo është koha e zgjidhjeve madhore në mbarë rajonin tonë, bazuar në vullnetin e përbashkët për stabilizim përfundimtar të hapesirës ku gjendemi me synimin për ta bërë atë pjesë të pandarë të Bashkimit Evropian.
Inkurajojmë të dy vendet për përmbylljen e të gjithë hapave për hyrjen në fuqi të marrëveshjes.
Kjo marrëveshje i shërben miqësisë, prosperitetit e perspektivës evropiane të dy vendeve dhe qytetarëve të rajonit tonë.
(B.H/Faxweb)
