Kryetari i Bashkisë Klos Basir Çupa ka paralajmëruar kryebashkiakun e Tiranës se nuk do të lejohet që të marrë ujin e Gurrave të Gurit të Bardhë për të furnizuar Tiranën.
Kjo, sepse sipas tij ai ujë është jetik për 20 mijë banorët e Klosit, duke i sugjeruar Bashkisë Tiranë që të gjejë të tjera alternativa.
“Veliaj të mos e prekë ujin tonë, nuk kemi ujë për të çuar në Tiranë, ky ujë përdoret nga banorë të 5 fshatrave, ne si bashki do ta kundërshtojmë deri në revoltë popullore sepse nuk do të lejojmë që ky territor të shpopullohet nga politikat e gabura. Uji është i lidhur ngushtë me jetën e këtyre banorëve. Të gjejnë burime të tjera alternative për të gjetur zgjidhjen për Tiranën.
Jemi të vendosur si komunitet, si Bashki që ai ujë të përdoret vetëm për interesa të banorëve. Ne kemi një pjesë të fshatrave të Klosit pa ujë të pijshëm dhe institucionet e tjera duhet ta kishin informuar Bashkinë Tiranë. Bashkia e Tiranës duhet të dijë se ai komunitet nuk ka ujë të pijshëm mjaftuesshëm. Ai ujë është shumë i domosdoshëm për 20 mijë banorët e Klosit”, tha Çupa. (B.H/Faxweb)
