Mijëra pushues dhe qindra automjete dhe autobusë këtë fundjavë i janë drejtuar bregdetit të Shqipërisë, për të kaluar fundjavën dhe pushimet verore. Nga të dhënat, bëhet e ditur se numri më i lartë i shtetasve që kanë hyrë në Shqipëri përmes Morinit ka qenë nga Kosova, por ka pasur edhe nga Maqedonia dhe Mali i Zi.
Sipas të dhënave të policisë së Kufirit, vetëm në 24 orët e fundit kanë hyrë në Shqipëri më shumë se 25 mijë persona.Të dhënat nga pika doganore flasin për rreth 6 mijë automjete. Vetëm në orët e para të ditës së dielë në Morin, kanë kaluar rreth 19 mijë persona .
Për të përballuar situatën dhe evituar krijimin e radhëve në kufirin mes Shqipërisë dhe Kosovës, uniformat blu të Policisë Kufitare kanë punuar me 8 sportele për të përpunuar sa më shpejt dokumentacionin e personave dhe automjeteve duke krijuar kushte optimale për kalimin e lirë dhe pa vonesa të kufirit.
Edhe pse fluksi i qytetarëve të Kosovës ka qenë shumë i lartë, shtimi i sporteleve dhe procedura e përshpejtuar që aplikohet nga Policia Kufitare kanë shmangur radhët dhe kohëzgjatjen në doganë. Fluksi i lëvizjes është ndjerë përgjatë gjithë Rrugës së Kombit, e cila nga 1 Korriku e në vijim monitorohet me patrulla të përbashkëta të policisë se dy vendeve.
