Mbi 300 priftërinj katolikë akuzohen se kanë abuzuar seksualisht me të paktën 1 mijë fëmijë gjatë një periudhe 70 vjeçare në shtetin e Pensilvanisë.
Gjetjet bazohen në raportin e një jurie të madhe që mbështetet në dokumenta të brendshëm të 6 dioqezave në këtij shteti.
Por sipas anëtarëve të jurisë së madhe numri i fëmijëve të abuzuar, të dhënat për të cilët mund të kenë humbur apo që nuk kanë guxuar të dalin publikisht, mund të jetë edhe më i madh, në disa mijëra.
Sipas Prokurorit të Përgjithshëm të Pensilvanisë Josh Shapiro zyrtarët e kishës i përshkruanin vazhdimisht abuzimet si lojëra, ndeshje fizike apo kontakte të papërshtatshme, por nuk ishin të tilla.
Ai tha se ato ishin abuzime seksuale me fëmijët, madje edhe përdhunime. Për vetëm dy prej 300 priftërinjve që përmenden në raport janë ngritur akuza penale, kjo pasi shumica e priftërinjve ose kanë vdekur ose u ka kaluar periudha që ndaj tyre të nisë një proces ligjor shkruan VOA.
Prokurori i Përgjithshëm Shapiro tha se “modeli ishte abuzo, mohoje dhe mbuloje. Si pasojë, jo vetëm që u viktimizuan fëmijët, por u krijuan edhe hapësirat ligjore për manipulim nga zyrtarët e kishës”.
Vatikani nuk ka komentuar ende rreth këtij raporti, por të martën dioqeza e Pitsburgut kërkoi falje. Ndërkohë ish-kardinali i Pitsburgut Donald Wuerl, i cili tashmë është kryepeshkop i Uashingtonit, i mohoi akuzat e jurisë së madhe, se ai i pati mbrojtur priftërinjtë abuzues.
Discussion about this post