Në raportin pasqyrë të monitorimit të Parlamentit për periudhën Janar-Korrik 2018, Instituti i Studimeve Politike zbuloi edhe deputetin me më shumë fjalime në Kuvend. Në tabelën e publikuar kreun e renditjes e mban kreu i Grupit Parlamentar të PS-së, Taulant Balla i ndjekur nga kreu i PD-së, Lulzim Basha.
“Sipas të dhënave të tabelës, janë bërë diferencat në fjalime midis numrit të fjalimeve individuale dhe atyre që janë kërkuar për procedurë nga titullari politik ose drejtuesi e seancës në Kuvend. Në secilin rast Balla dhe Basha kryesojnë listën e diskutantëve, me përkatësisht 14 dhe 13 fjalime personale, ose 20 dhe 17 fjalime në tërësi. Secili prej tyre ka ndodhur të ketë diskutuar më shumë se një herë në një seancë, megjithatë metodologjia e monitorimit merr për bazë vetëm një fjalim ditor. Po ashtu në llogaritjen e klasifikimit të numrit të fjalimeve nuk janë marrë për bazë ndërhyrjet për procedurë apo replikë, të cilat në thelb nuk tregojnë asgjë në sjelljen parlamentare të një deputeti dhe as në funksionet e tij përfaqësuese dhe ligjvënëse.
Dy figurat e LSI, Rama e Vasili ndajnë të njëjtin nivel fjalimesh, ndërkohë që kryeministri Rama ka numerikisht më pak fjalime se Basha dhe Vasili. Disa deputetë, sidomos të ardhur rishtas më 2017, vijojnë të kenë prirjen e daljes rast pas rasti në tribunën e parlamentit për të mbajtur fjalime, të cilat tregojnë vëmendje e fokusim të tyre, por gjithsesi, në renditjen finale të efektivitetit të deputetëve edhe në këtë raport monitorimi tregohet se nuk janë përcaktuese suksesi. Për shembull, deputetët Balliu, Baçi, Spiropali, etj, kanë qenë aktiv në fjalime në parlament në dy sesionet e fundit parlamentare, por kanë tregues më pak entuziastë në vlerësimet e funksioneve të tjera parlamentare, përfshirë aktivitetin në komision apo nismat ligjore”, shkruhet krahas renditjes së publikuar.
(J.D/Faxweb.al)
Discussion about this post