Pasi ish-kryeministri i Maqedonisë, Nikolla Gruevski bëri të ditur se ka kërkuar azil politik në Hungari, mungesat e tij si deputet në Kuvendin e Maqedonisë prej ditës së sotme do të konsiderohen si “mungesa pa arsyetim”.
Përmes një postimi në ‘Facebook’ kryetari i Kuvendit Talat Xhaferi thotë se sipas rregullores “Deputetit i cili mungon më së paku tre herë një pas një në seancat e Kuvendit, a për këtë nuk e ka informuar kryetarin, i hiqen 5% nga rroga për çdo ditë mungesë”.
Postimi i plotë i Talat Xhaferit:
K U M T E S Ë
Sot, në koordinim te kryetari i Kuvendit të Republikës së Maqedonisë, z. Talat Xhaferi,
u mor konkludimi se deputeti Nikola Gruevski, prej ditës së sotme konsiderohet si mungues pa arsyetim, duke i marrë parasysh informatat e organeve kompetente se ai është në ikje.
Sipas Nenit 30 të Rregullores për punë të Kuvendit të Republikës së Maqedonisë, deputeti i cili është i penguar të jetë i pranishëm në seancë të Kuvendit, nëpërmjet Grupit parlamentar e informon kryetarin për mungesën. Deputetit i cili mungon më së paku tre herë një pas një në seancat e Kuvendit, a për këtë nuk e ka informuar kryetarin, i hiqen 5% nga rroga për çdo ditë mungesë, për çka nxjerr akt Komisioni për Çështjet e Zgjedhjeve dhe Emërimeve. Ky nen do të vlejë për mungesën e paarsyetuar të deputetit Nikola Gruevski.
(B.H/Faxweb)
Discussion about this post