PD reagon pas deklaratës së kreut të ARRSH: Qeveria po bën diversion, ja qëllimi i saj

Projekti i “Unazës së Madhe” ka shkaktuar një valë protestashnga banorët e zonës së “Astirit”, ku këta të fundit refuzojnë prishjen e banesave dhe bizneseve të tyre pa u dëmshpërblyer 100% për vlerën e pronës.

Banorët pretendojnë se nuk janë pritur nga Autoriteti Rrugor Shqiptar, ndërsa në një deklaratë për “Fax News” drejtori i ARRSH-së, ka hedhur poshtë këto pretendime, ku duke iu referuar rastit të Dorian Protoduari i cili deklaroi se banorët nuk janë pritur nga kreu i ARRSH, Qendro u shpreh se kjo nuk është aspak e vërtetë pasi sot në 09:30 minuta i ati i Protoduarit ka vajtur në zyrat e ARRSH dhe ka paraqitur dokumentet për banesën e tij.

Pas kësaj, ka reaguar edhe deputetja e Partisë Demokratike Dhurata Çupi, është shprehur se qeveria po përpiqet të bëjë diversion mes banorëve të Unazës së Re, me qëllim përçarjen dhe mashtrimin e tyre.

“Qeveria po përpiqet të bëjë diversion mes banorëve protestues tek Unaza e Re me qëllimin final përçarjen dhe mashtrimin e tyre.

I tillë është qëndrimi i sotëm Autoritetit Rrugor Shqiptar, i cili fton banorët “të marrin kontakt ne ARRSH-në për të marrë informacionin që u nevojitet.:

Banorët e zonës tek Unaza e Re janë në të drejtën e tyre kushtetuese dhe ligjore për të protestuar dhe mbrojtur pronën e tyre.”, – shkruan deputetja demokrate.

Më tej Çupi, u bën thirrje banorëve që të mos dorëzohen.

“U bëj thirrje të gjithë banorëve që përballen me dhunën dhe presionin e qeverisë të mos bien pre e mashtrimit! Qytetarët duhet ta dinë se: Paraqitja ne ARRSH nuk është zgjidhje ligjore, por diversion dhe manipulim I tyre.

Ligji për shpronësimet publike ka përcaktuar qartë procedurat që ndiqen në çdo rast të shpronësimit. Ky proces duhet të jetë transparent dhe jo selektiv.”, – shkruan deputetja.

Në përfundim të reagimit të saj, Dhurata Çupi shkruan:

“Në kushtet e errësirës informuese, përmes akteve në kundërshtim të plotë me ligjet shqiptare, ARRSH u kërkon banorëve të paraqiten pranë këtij institucioni, me dokumentet që ata posedojnë, duke tentuar kështu tejkalimin e parashikimit ligjor për shpronësimet.

Ligji kërkon bërjen publike të lista së plotë të objekteve që do të shemben.

Bashkë me deputetë të tjerë dhe ekspertë në PD, mbetemi të gatshëm të ofrojmë asistencë ligjore për çdo banor, shtëpia e të cilit është nën kërcënimin e fadromave të Edi Ramës dhe Erion Veliajt.”

(B.B/ Faxweb.al)