Kryeministri Edi Rama ka reaguar pasi presidenti Meta ka kthyer Buxhetin e vitit të ardhshëm. Rama thotë se presidenti i vendit kthen buxhetin e të gjithë shqiptarëve fill pas prezantimit të kërkesave të LSI-së. Rama thotë se ky vendim i Metën shton presionin mbi studentët, për t’i mbajtur ata larg dialogut.
Reagimi i Edi Ramës:
Interesant! Presidenti kthen buxhetin e Shqipërisë pas prezantimit të kërkesave të LSI-së. Asnjë çudi! Vazhdon papushim e në çdo formë, presioni mbi studentët për të qëndruar në kor kundër Dialogut Miq! Dilni nga kurthi i atij kori dhe bëhuni individë që flasin në emër të vetes .
Reagimi i Metës:
Presidenti i Republikës Ilir Meta, thotë se duke ndjekur me shumë vëmendje situatën politike më të fundit në vend, si dhe duke vlerësuar konsensusin e gjerë publik mbi kërkesat e studentëve, të cilat janë konsideruar nga të gjithë aktorët politikë si, të drejta, legjitime dhe të realizueshme, duke synuar interesin më të mirë në përmbushjen e objektivave sociale të parashikuara në nenin 59 të Kushtetutës, si dhe në garantimin e stabilitetit në vend, me dekretin nr. 10997, datë 13.12.2018 ka vendosur “Kthimin për rishqyrtim në Kuvend të ligjit nr.99/2018 “Për buxhetin e vitit 2019”, me qëllim rishqyrtimin e tij.
Presidenti i Republikës, ka besimin e plotë se Kuvendi i Shqipërisë do të reflektojë një bashkëpunim gjithëpërfshirës me qëllim plotësimin e kërkesave të studentëve dhe interesit publik.
Buxheti për vitin 2019 ishte votuar në Parlament një javë më parë dhe pritej të dekretohej nga Presidenti i Republikës. Por, për shkak se rritja me 5% e buxhetit për arsimin është një nga kërkesat e studentëve, kreu i shtetit e ka kthyer në Parlament për t’u rishqyrtuar.
(E.K/FAXWEB.AL)
Discussion about this post