Një ngjarje e rëndë ka ndodhur mëngjesin e sotëm në Tiranë, ku punonjësi i Gardës së Republikës Alket Arapaj ka qëlluar me armë për vdekje në banesë bashkëshorten e tij Ervilma Seferi.
Menjëherë pas ngjarjes 44-vjeçari është arrestuar nga ana e Policisë dhe SHÇBA-së, ndërsa mbi të rëndon akuza “Vrasje për shkak të marrëdhënieve familjare”.
Nuk dihen ende rrethanat e plota të ngjarjes, dhe as nëse bashkëshortët kanë pasur probleme të mëparshme mes tyre.
Çifti ka një fëmijë, ndërsa gardisti është me arsim të lartë ushtarak (1993-1997), me gradën Kapiten me 21 vite punë ne Gardën e Republikës. Familja ka qenë praktikuese e fesë myslimane, dhe nuk njiheshin për probleme të mëparshme nga ana e fqinjve.
Vrasja ka ndodhur në katin e 4-tërt të një pallati në zonën e Alliasit, ndërsa mbi Seferin mësohet se janë qëlluar disa plumba.
Këtu mund të lexoni dhe dëshmitë e fqinjëve të çiftit, të cilët shprehen të tronditur nga ngjarja që ka ndodhur: https://www.faxweb.al/mezi-e-bene-vajzen-flasin-fqinjet-e-44-vjecarit-qe-vrau-gruan-ne-tirane-jemi-te-habitur/
Njoftimi i Policisë për ngjarjen:
Shërbimet e Policisë të Komisariatit Nr.4, në bashkëpunim me SHÇBA arrestuan në flagrancë shtetasin A. A., 44 vjeç (punonjës në Gardën e Republikës).
Rreth orës 06:00 të mëngjesit, në banesën e tij në Allias, ai dyshohet se ka vrarë me armën e shërbimit bashkëshorten, 36 vjeçe.
Materialet iu referuan për veprime të mëtejshme Prokurorisë së Rrethit Gjyqësor Tiranë për veprën penale “Vrasje për shkak të marrëdhënieve familjare”.
(E.K/FAXWEB.AL)
