Ministrja e re e Kulturës Eva Margariti ftoi pak ditë më parë aktivisten Elona Caslli që të ishte këshilltarja e saj në Ministri, duke qenë se ajo është një nga aktivistet dhe letraret më aktive.
Por duket se Caslli e ka të qartë objektivin e saj në mbrojtje të godinës së Teatrit Kombëtar, dhe pas një viti proteste të vazhdueshme ka ftuar ministren që të jetë pjesë e takimeve të çdo mbrëmje në shesh.
Caslli është e bindur se nëse bashkohet me artistët në sheshin përpara Teatrit, Ministrja e re do të ndryshojë mendimin e saj për prishjen e godinës.
Reagimi i Casllit:
Takohemi në Sheshin e Teatrit Kombëtar Znj. Ministre
Duke qenë se përmes një mediumi njerëzor, më përcollët konsideratën Tuaj të lartë Znj. Ministre dhe më ftuat të isha Këshilltarja Juaj në Ministrinë e Kulturës, e quaj të dobishme që t’Ju ftoj në Sheshin e Teatrit Kombëtar, ku unë, gjendem çdo mbrëmje.
Mediumi njerëzor, nënvizoi faktin se Ju i çmoni “ zërat kundër” dhe jeni e hapur për bashkëpunim kurdo dhe kudo.
Nëse përkushtimi Juaj ndaj kulturës dhe artit shqiptar është i përveçëm, atëherë Ju ftoj në Sheshin e Teatrit Kombëtar në orën 18:30 çdo mbrëmje.
Aty do të keni rastin të takoheni me artistë, të cilët , me punën e tyre e kanë identifikuar Shqipërinë në kontekst europian. Artistë, të cilët përfaqësojnë hartën kulturore të Shqipërisë në Europë.
Jam e bindur se një bisedë e gjatë me ta, do të kthjellonte vizionin dhe misionin Tuaj.
Post scriptum- Ju falenderoj paraprakisht për vëmendjen dhe vlerësimin. Nuk mund t’i përgjigjem pozitivisht ftesës Suaj, pasi unë besoj, se Këshilla më e mirë për Artin buron vetëm nga Sheshi i Teatrit Kombëtar.
Sinqerisht Elona Caslli
(E.K/FAXWEB.AL)
Discussion about this post