Fshati i Verrisë në Fier, i cili u bë i njohur për opinionin publik për ngritjen e një inceneratori për mbetjet urbane në këtë zonë, tashmë është kthyer në një fshat të braktisur. Të gjithë po largohen nga aty pasi humbën me protestat dhe peticionet e nënshkruara në kundërshti të ndërtimit të inceneratorit.
Banorët nuk shohin të ardhme pasi impianti i mbetjeve do të helmojë ajrin ujin dhe tokën. Kjo popullsi fermere dhe blegtore e sheh jetën të paralizuar këtu ndaj dhe shumë kanë marrë rrugët e emigrimit.
Edhe pse protestuan për ditë me radhë, qëndresa e banorëve nuk e arriti qëllimin për ta ndalur ndërtimin e inceneratorit pasi cdo gjë ishte e vendosur nga lart. Tashmë në shtëpitë e Verrisë, ka nga 2 ose 3 persona, në mos disa banesa janë boshatisur tërësish.
Tashmë në Verri rruga është dhe më e amortizuar, ndërsa ka mjete të tonazhit të rëndë të cilat çojnë materiale ndërtimi atje tej, në mushkërinë e tokave të Verrisë nga do të burojnë të ardhura për qeverinë.
Gjatë gjithë rrugës që përshkron fshatin shohim dhe takojmë ndonjë banorë të moshës mbi 40 vjeç sepse e gjithe rinia e familjet e reja kanë braktisur vendlindjen e janë larguar jashtë vendit.
Përshkojmë rrugën në kembe përmes fshatit, ç’të shohësh.
Harresë, degradim. tym, amortizim shtëpish, dyer të mbyllura e porta të shtepive që ju ka dalë ngjyra, mure të plasaritura, oborre e lulishte të lëna pa lule.
Tek ecim takojmë dhe na shoqëron kryeplaku i fshatit, Ndon Bualli , i cili tregon se cdo gjë u shua për se gjalli e iu fik jeta dhe e ardhmja e fëmijëve, të cilet po largohen nga gjiri i familjes. Ai tregon se si vetëm këtë fillim viti të 2019 janë larguar mbi 20 të rinj.
Në fshat kanë mbetur të moshuar me zemrën e thyer, që shprehen se tashmë presin vetëm të mbyllin sytë.
‘’Ç’të them, kur të ikin femijet cka mbeti për mua asgjë ….Po pres tashme të mbyll sytë”, shprehet një prej banorëve.
Discussion about this post