Endri Fuga i përgjigjet Presidentit të PPE: Këto janë “të drejtat” e opozitës sonë…

Këshilltari për Mediet në Kryeministri, Endri Fuga, ka reaguar pas deklaratës së bërë nga Presidenti i Partive Popullore Evropiane, Joseph Daul.

Fuga ka reaguar me anë të një komenti në postimin e bërë nga Daul, ndërsa shkruan se deputeti demokrat Edi Paloka hodhi bojë mbi kryeministrin Edi Rama.

“Këto janë “të drejtat” që opozita jonë ushtroi sot në parlament. Supozohej të ishte një sesion për Maqedoninë e Veriut por deputetët e Partisë Demokratike menduan se ishte “e zgjuar” të hidhnin bojë drejt Kryeministrit,”- komenton Fuga në postimin e Daul në Twiter.

Kujtojmë se pak më parë Presidenti i PPE-ve Joseph Daul, me anë të një statusi në rrjetet sociale, shkruajti se zgjedhjet duhet të jenë të lira dhe se të drejtat e opozitës duhet të respektohen në parlament.

“Jam i shqetësuar për gjendjen e demokracisë në Shqipëri. Zgjedhjet e ardhshme duhet të jenë të lira dhe të ndershme, blerja e votës është e papranueshme. Të drejtat e opozitës duhet të respektohen në parlament. Duhen më shumë përpjekje për të luftuar krimin dhe korrupsionin, përfshirë edhe implementimin e ligjit të dekriminalizimit,”– u shpreh ai.

Reagimi i Endri Fugës, vjen pas incidentit të ndodhur sot në seancën plenare, ku nënkryetari dhe deputeti i PD, Edi Paloka sulmoi me një shiringë me bojë kryeministrin Edi Rama. Seanca u ndërpre dhe Paloka u përjashtua me 10 ditë nga punimet e Kuvendit.

(B.B/ Faxweb.al)