Referuar deklaratave të ndërkombëtarëve për protestë paqësore dhe duke i bërë thirrje opozitës për të mos djegur mandatet, gazetarja Mimoza Koçiu me anë të një postimi në Facebook ka krijuar një deklaratë hipotetike për protestën sot.
Gjatë protestës së opozitës së bashkuar ditën e sotme para Kuvendit ndodhi një akt i paprecedente, ku u ndërprenë të gjitha valët e kompanive celulare të lëvizshme.
Pikërisht për këtë gazetarja e njohur shkruan se nëse do të ishte ndërkombëtare do të bënte një deklaratë të thjeshtë ku shprehet keqardhje për gjestin e ndërprerjes së sinjalit të telefonisë së lëvizshme, si cënim i të drejtës së qytetarëve për një shërbim kontraktual, edhe gjatë një proteste paqësore.
“Sikur të isha ndërkombëtare, sapo të më vinin valët e celularit, do bëja këtë deklaratë krejt të thjeshtë!
Përshëndesim protestën paqësore të qytetarëve shqiptarë të thirrur nga opozita, si një tipar themelor e vlerë thelbësore për demokracinë! Përgëzojmë udhëheqësit politikë për mesazhet demokratike gjatë kësaj proteste, si akte demokracie, që ndodhin në cdo vend me demokraci funksionale dhe tregojnë se Shqipëria është gati për t’u bërë pjesë e Bashkimit Europian. Shprehim keqardhje për gjestin e ndërprerjes së sinjalit të telefonisë së lëvizshme, si cënim i të drejtës së qytetarëve për një shërbim kontraktual, edhe gjatë një proteste paqësore.
Ftojmë qeverinë të lexojë mesazhin e qytetarëve të vet, e të kujtojë kuptimin bazik të demokracisë: “demos” që do thotë popull e “kratia”, që do thotë ”pushtet”, pra demokracia është as më shumë e as më pak, por “pushtet i popullit”.-shkruan Mimoza Koçiu.
(M.Q/Faxweb.al)
