Mbrëmjen e djeshme u raportua se pas një grabitje në banesë, një 69-vjeçar në Vlorë ishte paraqitur me fraktura të shumta në kokë në spital. Ndërkohë sot raportohet se i moshuari ka ndërruar jetë, dhe ai ka pasur një plagë të shkaktuar nga armë zjarri pas kokës.
Autori i vrasjes dyshohet se është nipi i tij, që për të fshehur krimin ngriti alibinë e grabitjes, dhe e dërgoi të moshuarin në spital. Mësohet se i riu ka shkaktuar rrëmujë në shtëpi, në mënyrë që të kamuflonte ngjarjen dhe ta paraqiste para uniformave blu si një grabitje në banesë.
Pas kësaj ai ka marrë rolin e shpëtimtarit duke e dërguar të moshuarin në spital. Por pak orë pas krimit të rëndë ai është penduar dhe ka treguar të vërtetën rreth ngjarjes.
Sipas burimeve nga policia e Vlorës, ai ka pranuar krimin, si dhe ka treguar vendin ku kishte fshehur armën. Ajo që e bën dhe më tragjike situatën është fakti se 69-vjeçari e kishte rritur i vetëm nipin, pasi prindërit e këtij të fundit kishin humbur jetën shumë vite më parë në një aksident rrugor.
Ndërkaq në dëshminë e tij përpara policisë, adoleshenti është shprehur se gjyshi kishte nisur që ta stresonte shumë kohët e fundit.
‘E vrava se më nxinte jetën. Më stresonte, nuk e duroja dot’, është shprehur i riu gjatë dëshmisë së tij.
Një prej nipërve të të moshuarit ka treguar se para dy muajsh ai kishte humbur dhe bashkëshorten, ndërsa të riun e kishte rritu që fëmijë. Djali shkonte në shkollë, dhe mbështetej financiarisht nga gjyshërit e tij, pasi kishte humbur prindërit.
(E.K/FAXWEB.AL)
Discussion about this post