Sekretari për Marrëdhëniet me Jashtë në Partinë Demokratike, Gert Bogdani, ka deklaruar në studion e A2CNN, se Rudina Hajdarin e pret një fat i ngjashëm me deputetin Myslim Murrizi në rast se ajo nuk pranon që të dorëzojë mandatin e deputetes.
Duke folur për aktualitetin politik dhe vendimin e opozitës për të djegur unanimisht mandatet e duputetëve, për shkak siç ka deklaruar ajo, të kriminalitetit, blerjes së votës dhe përshpejtimit të proceseve integruese të vendit, Bogdani nuk ka ndryshime midis Rudina Hajdarit dhe Myslim Murrizit në këtë rast.
“Besoj se standardet duhet të jenë të njëjta. Nuk mund të bëjmë standarde të dyfishta, nuk ka ndryshime midis Rudina Hajdarit dhe Myslim Murrizit në këtë rast”,tha Bogdani.
Kujtojmë se nga radhët e PD-së, deputeti i Lushnjes Myslim Murrizi nuk iu bashkua vendimit të opozitës për të djegur mandatin, ndërkohë që nga radhët e LSI-së, deputeti Lefter Koka gjithashtu nuk ka pranuar të heq dorë nga mandati i tij.
Gjithashtu Rudina Hajdari dhe Nard Ndoka, për arsye të ndryshme nga njëri-tjetri ende nuk kanë dhënë një qëndrim konkret nëse do ti bashkohen vendimit të opozitës apo jo.
Nga ana tjetër përflitet se janë një grup i konsiderueshëm kandidatësh nga listat e zgjedhjeve të 2017 të cilët do të plotësojnë vendet vakante të deputetëve të opozitës që kanë vendosur të djegin mandatet.
(F.GJ/FAXWEB.AL)
