Luan Rama, zv/kryetar i Lëvizjes Socialiste për Integrim, komentoi në studion e Top Talk, marrjen e mandateve nga ana e 4 deputetëve të rinj nga lista e LSI-së.
Sipas tij, “ka krizë politike që zgjidhet me mjete politike dhe vullnet politik” dhe për këtë arsye, “KQZ-ja nuk duhet të bëhet pjesë e kësaj farse”.
“Puna e Kuvendit dhe komisionet kanë rregulla strikte se si procedohet. KQZ-ja është investuar pa u zbatuar ligji pasi është detyrim ligjor që çdo deputet që largohet, duhet ta shprehë këtë në një seancë publike pasi nuk është thirrur komisioni përkatës i Kuvendit për të legalizuar djegien e mandateve të opozitës”, deklaroi Luan Rama.
Më tej, Luan Rama theksoi: “Kushtetuta thotë se Kuvendi përbëhet nga 140 deputetë dhe në momentin kur nuk janë aq, nuk është më Kuvend. Edhe një kur ikën, zëvendësohet menjëherë. Pavarësisht makinacioneve që bëhen, nuk shkohet te numri 140”.
Rama gjithashtu deklaroi se opozita nuk ka komplekse nëse Presidenti i Republikës i thërret të gjitha palët në një tryezë për zgjidhjen e krizës politike.
“Ne nuk kemi komplekse dhe nuk kushtëzojmë se kush vjen në tryezë dhe për çfarë vjen subjekti apo institucioni. Ne kërkojmë që për shkak të lidhjeve të qeverisë me krimin, që ky kryeministër të japë dorëheqjen. Sot më i rëndësishëm është interesi i vendit në kuadër të procesit të integrimit europian”, deklaroi Luan Rama.
Duke folur për qëndrimin e faktorit europian I cili janë e kaluar në një farë mënyrëe legjitimoi qeverinë, Luan Rama u shpreh: “Ata janë si dëshmitarët e një X sekti që janë në ikje e sipër. Me gjithë respektin, ata le të zgjidhin problemin e tyre në kuadër të zgjedhjeve që kanë në prill. Sot ata nuk përfaqësojnë më asgjë, janë deputetë në ikje”.
