Pas gjobës prej 40 milionë lekësh që iu vendos biznesit të tij, Arbër Çepani ka dhënë një intervistë për Fax News, ku ka treguar revoltën e tij përballë arrogancës shtetërore.
Teksa ka treguar detajet për gazetaren Edona Haklaj, Çepani u shpreh se gjithë procedura e ndjekur nga ana e tatimorëve ka qenë në shkelje me ligjin. Sipas tij kontrolli në biznes, dhe në kompjuterin e punës ka ndodhur pa praninë e tij.
“Të vritet shpresa për të punuar në Shqipëri, kemi një eksod të paparë të rinjsh, njësoj si të ishim në kohë lufte.Disa zyrtarë të veshur me kostum ushtrojnë pushtetin e tyre, dhe nuk duan tia dijnë fare për mundin e njerëzve. Ajo që të vret më shumë është arroganca, pasi për çështjen e shkeljes së procedurave unë kam depozituar një padi në gjykatë.
Nuk kemi të bëjmë me një biznes që nxjerr krom, dhe shfrytëzon lumenj. Kësaj çështje do ti shkoj deri në fund, sepse mund ta kisha mbyllur dhe në rrugë të tjera, po vjen një pikë që ty të vjen në majë të hundës, pasi sheh që njerëz të veshur me pushtet të shohin sikur ti po merresh me trafik kokaine. Vjen një pikë që ti thua boll më! Ti punon si qeni deri në darkë, paguan taksat dhe sheh kaq shumë abuzime rreth e qark teje”, u shpreh Çepani.
“Bëhet fjalë për datën 1 Dhjetor të 2018-tës, në një moment ku ishte piku i punës. Një grup tatimorësh që ishte nisur nga Tirana zbarkojnë në Pazarin e Korçës, njësoj si të ishin forcat RENEA, kontrollojnë tavolinat për faturat tatimore, cdo gjë ishte në rregull, më pas kontrollojnë për siguracionet punonjësit, dhe sërish ishte çdo gjë në rregull. Unë nuk isha present dhe kërkova që të më tregonin mandatin për të kontrolluar, filluan të sekuestronin çdo gjë që gjetën, pa parë nëse kishte fatura tatimore hyrëse”, tha më tej Çepani.
(E.K/FAXWEB.AL)
