Balla kërkoi shkarkimin e Klement Zgurit, Kuvendi e fut në rend dite 2 vjet më pas

Maxhoranca socialiste kërkon shkarkimin e Klement Zgurit, kreut të KQZ-së.

Kërkesa është depozituar në Kuvendin e Shqipërisë nga kreu i parlamentarëve socialistë, Taulant Balla që në vitin 2017 kohë kur sipas Ballës kreu i KQZ nuk respektoi ligjin e dekriminalizimit në rastin e kryebashkiakut të Mallakastrës, Agron Kapllanaj.

Megjithatë rreth 2 vjet më pas Kuvendi i Shqipërisë ka vendosur ta përfshijë në kalendarin 3 javor të punimeve.

Në kalendarin e punimeve të Kuvendit të Shqipërisë sqarohet se kërkesa për shkarkimin e kreut të KQZ-së Klement Zguri, e depozituar me 14.11.2017 nga kreu i grupit parlamentar PS Taulant Balla do të shqyrtohet fillimisht në Komisionin për Çështjet Ligjore, Administratën Publike dhe të Drejtat e Njeriut.

Në nëntor të 2017-s ishte vetë kryeministri Rama që deklaroi se mbështeste nismën e grupit parlamentar të PS-së për të shkarkuar nga detyra kryetarin e KQZ-së, Klement Zguri, i cili ka marrë në mbrojtje kryetarin e bashkisë së Mallakastrës, Agron Kapllanaj, një zyrtar i dënuar në Itali në vitin 1995 për vjedhjen e një automjeti.

Që nga viti 2017, Klement Zguri, drejton këtë institucion pasi zëvendësoi ish-kryetarin Denar Biba, i cili dha dorëheqje dhe kaloi në postin e nënkryetarit.