Ish-deputeti i Partisë Demokratike Ervin Salianji është marrë si i pandehur nga Prokuroria e Tiranës lidhur me çështjen e njohur si “Babale” e cila ka të bëjë me audio-përgjimet ku përfshihej edhe vëllai i ish-ministrit të Brendshëm, Fatmir Xhafaj.
Ish-deputeti akuzohet nga Prokuroria për “kallëzim të rremë” dhe pritet të paraqitet në gjykatë për tu njohur me akuzën ditën e premte në orën 09:00 (Lexo këtu).
Lidhur me këtë ka reaguar edhe Partia Demokratike e cila në një deklaratë të shpërndarë për mediat shkruan se Prokuroria zyrtarizoi vendimin politik të Edi Ramës për marrjen të pandehur të Ervin Salianjit. Sipas në këtë vendim nuk ka asnjë nsurprizë, ku i akuzuar është denoncuesi dhe jo ai që bën krimin.
“Denoncimi i Partisë Demokratike faktoi përfshirjen në trafik droge të vëllait të Ministrit të Brendshëm Fatmir Xhafaj dhe mbështetjen që i siguronte ai nga funksioni publik”, shkruhet ndër të tjera në deklaratë.
Reagimi i plotë i Partisë Demokratike:
Prokuroria nuk zhgënjeu dhe sot, kur zyrtarizoi vendimin politik të Edi Ramës për marrjen të pandehur të Ervin Salianjit. Asnjë surprizë nuk ka në këtë vendim, ku I akuzuar është denoncuesi dhe jo ai që bën krimin.
Denoncimi i Partisë Demokratike faktoi përfshirjen në trafik droge të vëllait të Ministrit të Brendshëm Fatmir Xhafaj dhe mbështetjen që i siguronte ai nga funksioni publik. Falë këtij denoncimi:
· Agron Xhafaj, vëllai i Ministrit të Brendshëm, nuk vazhdon të merret më trafik droge, por është në burg në Itali për trafik ndërkombëtar droge.
· Fatmir Xhafaj u shkarkua si Ministër i Brendshëm, duke mos përdorur më pushtetin e tij politik për të favorizuar të vëllain në trafik droge.
· Taulant Balla dhe Ardi Veliu u faktuan si manipulatorët e çeshtjes, duke fabrikuar prova e dëshmitarë, me qëllimin e vetëm mbojtjen e Ministrit të Brendshëm dhe vëllait të tj trafikant droge.
Vendimi politik i Prokurorisë është paralajmëruar nga Edi Rama që ditën e parë të zbulimit të skandalit nga Partia Demokratike. Akti i sotëm dëshmoi, edhe njëherë se, përsa kohë Edi Rama të jetë në Qeveri, drejtësia i ka duart e lidhura dhe krimi i organizuar do të jëtë i paprekshëm.
Edi Rama dhe prokuroria e tij politike nuk do t’ia mbyllin dot gojën opozitës! Partia Demokratike është e vendosur të denoncojë çdo aferë që provon se Qeveria Rama është produkt dhe peng i krimit të organizuar.
(F.GJ/FAXWEB.AL)
