Restaurimi i Qafë Pazarit Gjirokastër, këshilltarët bashkiakë kërkojnë supervizimin e projektit: Jo më probleme, si në lagjen Varosh

Në kuadër të projektit për rikonstruksionin e kalldrëmeve të Gjirokastrës, pikërisht për shkak të shqetësimit që është ngritur për mënyrën se si do të procedohet për zbatimin e projektit, anëtarët e Këshillit Bashkiak Gjirokastër së bashku me inxhinierin Pavli Mici, përfaqësues i FSHZH kanë mbajtur sot një mbledhje për të diskutuar për këtë projekt.

Gjatë takimit, anëtarët e Këshillit kanë shprehur rezervat e tyre në lidhje me projektin duke kërkuar që punimet të mbikëqyren nga Bashkia Gjirokastër me qëllim që të mos përsëritet e njëjta histori si në lagjen Varosh.

Anëtarët e Këshillit kanë kërkuar cilësi të punimeve nga mjeshtra të gurit dhe po ashtu të lejohet ndjekja e punimeve gjatë gjithë kohës dhe jo vetëm në momentin e marrjes së tyre në dorëzim.

Për tju përgjigjur shqetësimeve të ngritura, inxhinieri Pavli Mici është shprehur se: “Gjithë guri i hequr nga kalldrëmet është matrikulluar dhe ruhet në një magazinë, të cilën po të keni kureshtje edhe mund të shkoni ta shikoni.”

Sipas Micit, në kalldrëmet e Gjirokastrës nga analizat teknike dhe fiziko-kimike është përdorur guri i Mashkullorës, kështu që edhe për të zëvendësuar gurët e dëmtuar do të përdoren po gurët e Mashkullorës.

Në lidhje me shqetësimin e ngritur për materjalet që do të përdoren në projekt, inxhinieri Mici është shprehur se: “Materialet inxhinerike të përdorura në projekt janë të çertifikuara dhe të testuara si dhe kemi kemi bërë një marrëveshje me projektuesit që kanë projektuar rrjetin e ujrave të gjithë qytetit të Gjirokastrës… gjithë paisjet me të cilat do të punohet kanë ardhur në objekt pasi kemi marrë miratimin e vetë firmës.”

Gjirokastra është qyteti i parë e cila preket nga një projekt i integruar I cili përfshin 4 qytete të Shqipërisë: Berat, Përmet Gjirokastër dhe Sarandë.

Projekti për reabilitimin e infrastrukturës dhe kalldrëmeve të Gjirokastrës është një projekt për të cilin janë investuar një fond gati 138 milionë lekësh, i  iniciuar nga qeveria shqiptare dhe Ministria e Kulturës dhe i mbështetur  financiarisht nga Banka Botërore dhe FSHZH.

Sipas Micit me projektin, nuk bëhet fjalë për një restaurim, por me një ndërtim të rrjetit të kanalizimeve të ujrave të zeza, rrjetit të ujrave të shiut, të ujrave të bardha për furnizimin me ujë të të gjithë konsumatorve të Qafës së Pazarit, si dhe ndërtimi i rrjetit të energjisë elektrike, internetit, rrjetit të mbrojtjes kundra zjarrit etj.