Një grabitjeje me dhunë është regjistruar mëngjesin e sotëm në rrugën e Barrikadave në Tiranë.
Autorët kanë plagosur me thikë në pjesën e barkut pronarin e biznesit Agron Shima, i cili ishte duke lëvizur me motor, dhe i kanë marrë një shumë prej 60 mijë eurosh. Pronari ishte nisur në drejtim të bankës ku do të depozitonte dhe paratë e tij.
Burime bëjnë me dije për Faxweb.al se autorët kanë pasur dijeni për transfertën e parave, dhe e kanë pritur pronarin e Exchange-it pranë bankës, ku fillimisht e kanë goditur me levë. Pas rezistencës që ai ka bërë, e kanë goditur dhe me thikë.
Mësohet se Policia ka arrestuar njërin prej autorëve të kësaj plagoseje, identiteti i të cilit nuk bëhet ende i ditur, ndërsa autori i dytë është larguar së bashku me sasinë e konsiderueshme të parave.
Ngjarja ka shkaktuar panik në zonë, pasi numri i qytetarëve që kalojnë në këtë rrugë në orët e para të mëngjesit është mjaft i madh.
Njoftimi i Policise:
Rreth orës 09:12, në rrugën e “Barrikadave” shtetasi A. Sh., rreth 50 vjeç (pronar i një pike këmbimi valutor) ka qënë duke lëvizur me motorr ndërkohë që është goditur me mjete të forta nga dy persona duke i marrë një sasi lekësh.
Reagimi në kohë i Policisë ka bërë të mundur kapjen dhe shoqërimin në Komisariat të njërit prej autorëve të dyshuar, ndërkohë që autori tjetër ka arritur të largohet.
Shërbimet e policisë janë vënë në ndjekje dhe po punohet për kapjen e tij.
(E.K/FAXWEB.AL)
Discussion about this post