Prej shumë kohësh në vendin tonë politikanët janë të lidhur ngushtësisht me performancën e tyre në rrjetet sociale, dhe menaxhimin e sjelljes në rrjet. Jo pak herë flitet se pas zyrave të shtypit qëndrojnë qindra persona, e mesa duket vetëm në Facebookun e kryeministrit Rama janë 23 editorë.
Një prej atyre që e menaxhon këtë faqe lokalizohet me qëndrim në Rumani, po është e pamundur që të specifikohet identiteti i tij. Përmes një ndryshimi të fundit të bërë nga Facebook, ndjekësit kanë mundësi që të gjejnë sesa persona kanë akses si editor apo moderator në një faqe të caktuar në rrjetet sociale.
“Po ky Rumuni qe futet ne llogarine e kryeministrit tone c’te jete? Agjent rus i kamufluar si rumun!?”, shkruan Lindita Çela, e cila ka publikuar dhe informacionin në Facebook për faqen e kryeministrit të vendit.
Ndërkohë që në kuadër të këtyre ‘’gërmimeve”, Faxweb.al raporton se faqja e ish-kryeministrit Sali Berisha administrohet nga 6 persona, 2 prej të cilëve ndodhen në SHBA.
Në një numër më të reduktuar nga kryeministri Rama, Lulzim Basha ka zgjedhur që t’ia besojë administrimin e Facebookut të tij 12 personave, të gjithë me banim në Shqipëri.
15 persona punojnë si menaxhues të profilit zyrtar të kryebashkiakut të Tiranës Erion Veliaj.
Kaq mjafton për të kuptuar se liderët politikë në vendin tonë nuk janë ata që fshihen pas komenteve të shkëmbyera apo publikimeve të postimeve, pasi stafi me dhjetra persona, është i kujdesshëm që të flasë në emër të tyre.
(E.K/FAXWEB.AL)
